Skenat e dhunës barbare të ushtruar mbi qytetarët e thjeshtë nuk morën asnjë dënim apo distancim zyrtar, por përkundrazi, u shpërblyen bujarisht nga qeveria. Përmes projektbuxhetit të vitit 2027, Ministria e Brendshme parashikon një fond rekord prej rreth 40 miliardë lekësh, nga të cilat 3.3 miliardë lekë shkojnë drejtpërdrejt për rritjen e pagave të Policisë së Shtetit. Ndërsa qytetarët përballen me brutalitetin në rrugë dhe me mospërgjigjen e institucioneve, pushteti zgjedh të blejë besnikërinë e uniformave me rritje pagash që arrijnë deri në 27% për inspektorët, duke i kthyer paratë e po këtyre qytetarëve në një mburojë financiare për veprimet e tyre.
Drejtuesit e dikastereve financiare dhe të rendit, Ministri i Punëve të Brendshme Ervin Demo dhe Ministri i Financave Petrit Malaj, e kanë paketuar këtë rritje si një "arritje historike" për mbarëvajtjen e sigurisë dhe turizmit. Sipas të dhënave të paraqitura në komisionet parlamentare, mbi 8,000 efektivë me gradën Inspektor do të përfitojnë një shtesë prej 20 mijë lekësh në muaj, duke e çuar pagën bazë nga 73 mijë në 93 mijë lekë. Mirëpo, ky shpërblim financiar jepet në një kohë kur profesionalizmi i policisë mbetet në pikën më të ulët, duke provuar se përbalta e qytetarëve nuk është shqetësim për zyrtarët e lartë, për sa kohë rendi shërben për të mbrojtur interesat e pushtetit.
Nga ana tjetër, e gjithë kjo skemë shpërfaq dështimin dhe plogështinë e klasës politike në tërësi, përfshirë opozitën dhe organet e kontrollit, të cilat mjaftohen me debate sipërfaqësore nëpër komisione pa kërkuar asnjë llogari reale. Në vend që të vendosen tregues të qartë matës për disiplinën, respektimin e të drejtave të njeriut apo luftën ndaj korrupsionit brenda vetë radhëve të policisë, buxheti miratohet si një çek i bardhë. Qytetarët mbeten përsëri të pambrojtur, duke paguar nga xhepat e tyre miliona euro për një polici që paguhet më shumë, por që vazhdon të përdorë forcën mbi po të njëjtit taksapagues.
