Një shpërthim me lëndë plasëse ka tronditur gjatë orëve të para të mëngjesit qytetin e Lezhës, duke shkaktuar panik te banorët e një kompleksi pallatesh në afërsi të zonës së “Milenium”. Ngjarja është regjistruar rreth orës 01:50, në një ambient parkimi (garazh), ku dyshohet se ka shpërthyer një sasi lënde plasëse e vendosur në një automjet tip “Benz”.
Si pasojë e shpërthimit, automjeti, në pronësi të shtetasit A.N., ka pësuar dëme të konsiderueshme, ndërsa fatmirësisht nuk raportohet për persona të lënduar. Zhurma e fortë e shpërthimit ka zgjuar dhe alarmuar banorët e pallatit, të cilët janë përballur me situatën në mes të natës.Pas marrjes së njoftimit, në vendngjarje kanë mbërritur shërbimet e Policisë, të cilat kanë rrethuar zonën dhe kanë nisur hetimet për zbardhjen e plotë të rrethanave. Grupi hetimor po shqyrton pamjet e kamerave të sigurisë në ambientet përreth, me qëllim identifikimin e personave që mund të kenë vendosur lëndën plasëse dhe largimin e tyre nga vendngjarja.Paralelisht, po punohet për përcaktimin e llojit dhe sasisë së lëndës plasëse të përdorur në shpërthim. Deri më tani, autorët mbeten të paidentifikuar, ndërsa policia vijon veprimet hetimore për dokumentimin e ngjarjes dhe zbulimin e motiveve të saj.
