Është zbardhur ngjarja në fshatin Godvi të Bulqizës, ku një 57-vjeçare dhe djali i saj 33-vjeçar janë ndaluar nga Policia, të dyshuar për vrasjen e 57-vjeçarit me inicialet U.F..

Fillimisht, familjarët raportuan se ai kishte humbur jetën pas sulmit nga një ari, por hetimet dhe ekzaminimet mjekoligjore zbuluan se 57-vjeçari ishte vrarë me armë zjarri.

Ngjarja ka ndodhur më 3 nëntor 2026, ndërsa pas hetimeve të kryera nga Sektori për Hetimin e Krimeve të Rënda në Drejtorinë Vendore të Policisë Dibër, në bashkëpunim me Prokurorinë, u bë i mundur dokumentimi i saj.

Në vijim, u ndaluan bashkëshortja e viktimës, 57 vjeçe, dhe djali i tij, 33 vjeç, të dy banues në fshatin Godvi. Ata dyshohen se, në bashkëpunim me njëri-tjetrin, e kanë vrarë me armë zjarri dhe mjete të forta prerëse.

Gjatë veprimeve hetimore, Policia sekuestroi një pistoletë model 54, me fishekë, si dhe një gëzhojë pistolete të gjetur në oborrin e banesës.

Materialet procedurale i janë referuar Prokurorisë së Dibrës për veprat penale “Vrasja për shkak të marrëdhënieve familjare” dhe “Mbajtja pa leje e armëve dhe municioneve”, kryer në bashkëpunim.

/rtsh.al/