Partia Demokratike ka nisur zyrtarisht betejën për mbrojtjen e Parkut Rinia nga ndërtimi i kullës, pas miratimit nga KQZ të formularëve për mbledhjen e firmave për zhvillimin e referendumit vendor. Përmes një deklarate, PD u bën thirrje qytetarëve, shoqërisë civile, aktivistëve dhe forcave politike opozitare që të bashkohen në këtë nismë, duke e cilësuar si një betejë për interesin publik dhe të ardhmen e kryeqytetit.

Demokratët kërkojnë një aksion të përbashkët opozitar për mbledhjen e nënshkrimeve, duke e cilësuar referendumin si një provë konkrete të bashkëpunimit përpara zgjedhjeve vendore. Sipas PD-së, kundërshtimi i betonizimit të Tiranës nuk duhet të mbetet në deklarata apo postime në rrjetet sociale, por të kthehet në një veprim të përbashkët në terren.

DEKLARATË E PARTISË DEMOKRATIKE

Partia Demokratike ka hedhur një hap konkret në mbrojtje të Parkut Rinia dhe kundër betonizimit të mëtejshëm të Tiranës. Komisioni Qendror i Zgjedhjeve ka miratuar formularët për mbledhjen e nënshkrimeve për zhvillimin e referendumit vendor, pas nismës së ndërmarrë nga përfaqësuesit e Partisë Demokratike, Jamarber Malltezi Dorjan Teliti Adriana Kalaja dhe Erges Eskiu.

Ky është një hap i rëndësishëm në betejën për t’ua kthyer qytetarëve të Tiranës të drejtën për të vendosur mbi qytetin e tyre.

Prej vitesh, kryeqyteti po i nënshtrohet një modeli zhvillimi ku betoni fiton mbi gjelbërimin, kullat mbi hapësirat publike dhe interesat e një pakice mbi nevojat e qindra mijëra qytetarëve.

Tirana po mbytet nga trafiku, ndotja, çmimet e papërballueshme të banesave dhe mungesa e hapësirave të gjelbra. Por përgjigjja e Edi Ramës është gjithmonë e njëjta: një kullë tjetër.

Partia Demokratike i thotë NDAL këtij modeli.

Ne besojmë se për fatin e Parkut Rinia duhet të vendosin qytetarët e Tiranës, jo një njeri i vetëm, sado pushtet të ketë grumbulluar.

Dhe këtë betejë nuk po e bëjmë vetëm me deklarata, statuse në Instagram apo spektakle mediatike.

Partia Demokratike po vepron. Me një nismë konkrete, me një procedurë ligjore dhe me një instrument të drejtpërdrejtë të demokracisë: referendumin.

Sot u drejtohemi të gjithë qytetarëve të Tiranës, shoqërisë civile, aktivistëve, organizatave qytetare dhe çdo force politike që kundërshton betonizimin e kryeqytetit:

Bashkohuni me ne për mbledhjen e firmave!

Kjo nuk është një betejë për flamurin e Partisë Demokratike. Është një betejë për qytetin tonë, për fëmijët tanë dhe për të drejtën e qytetarëve që të mos trajtohen si spektatorë të vendimeve që u ndryshojnë jetën.

Partia Demokratike është e gatshme të bashkëpunojë me çdo faktor opozitar, pa përjashtim, për të mbledhur sa më shpejt nënshkrimet e nevojshme dhe për t’i hapur rrugën referendumit.

Kjo nismë është njëkohësisht një mundësi për të provuar në praktikë bashkëpunimin opozitar përpara zgjedhjeve vendore.

Sepse bashkimi i opozitës nuk mund të mbetet një slogan që përsëritet në studio televizive, në konferenca shtypi apo në rrjetet sociale.

Bashkimi provohet në terren, në përballje me pushtetin, në mbrojtje të interesit publik.

Kjo është prova e parë konkretee gatishmërisë për të vendosur interesin qytetar mbi egot politike, llogaritë e vogla dhe protagonizmin personal.

Ne nuk kemi nevojë për një opozitë që konkurron se kush bën postimin më të bukur kundër Edi Ramës. Kemi nevojë për një opozitë që bashkon forcat për t’i ndalur vendimet e tij.

Nuk kemi nevojë për opozitarizëm fasade, por për aksion qytetar.