Një grua ka humbur jetën dhe një person tjetër vijon të jetë i zhdukur nën rrënojat e pallatit pesëkatësh në lagjen “Beqir Dardha” të Elbasanit, ku ndodhi shpërthimi i fuqishëm. Drejtori i Policisë së Elbasanit, Kastriot Skënderaj, bëri të ditur se dyshimet e para lidhen me shpërthimin e një bombole gazi, por shkaku përfundimtar pritet të përcaktohet pas ekspertizës.
Në një deklaratë nga vendngjarja, Skënderaj tha se telefonata për incidentin është marrë në sallën operative të Policisë rreth orës 16:40. Shërbimet policore që ndodheshin pranë zonës kanë mbërritur menjëherë dhe kanë konstatuar zjarr në katin e tretë të pallatit.
Sipas tij, efektivët kanë ndërhyrë në numër të konsiderueshëm për t’u ardhur në ndihmë banorëve dhe për të nxjerrë nga ndërtesa personat që ndodheshin në apartamente, përfshirë edhe ata që ishin asfiksuar nga tymi.
“Ju bëj me dije se telefonata në sallën operative të Drejtorisë Vendore të Policisë Elbasan ka ardhur rreth orës 16:40. Shërbimet e Policisë, të cilat ndodheshin në afërsi të vendngjarjes, kanë mbërritur menjëherë dhe kanë konstatuar një zjarr në katin e tretë të një pallati, ku ndodhemi edhe ne aktualisht. Shërbimet e Policisë kanë mbërritur në numër të konsiderueshëm dhe u kanë ardhur në ndihmë qytetarëve që ndodheshin në apartament, duke bërë të mundur nxjerrjen e tyre, përfshirë edhe personat që ishin asfiksuar nga tymi”, deklaroi Skënderaj.
Drejtori i Policisë konfirmoi se një grua ka humbur jetën, ndërsa vijojnë kërkimet për gjetjen e personit që ndodhej në apartamentin e katit të tretë dhe që ende nuk është lokalizuar.
Ai theksoi se, pavarësisht dyshimeve fillestare për një bombol gazi, ende nuk ka një përfundim zyrtar për shkakun e shpërthimit. Për këtë arsye, pritet ndërhyrja e shërbimeve zjarrfikëse dhe grupeve të specializuara që po vijnë nga Tirana.
“Një grua ka humbur jetën, ndërsa një person tjetër, i cili ndodhej në katin e tretë të apartamentit, ende nuk është gjetur. Këtë rast po e trajtojmë me vëmendje maksimale. Shpërthimi ka qenë shumë i fuqishëm, por në këtë fazë nuk mund të japim një shkak të saktë për atë që ka ndodhur. Fillimisht informacioni që kemi marrë ka qenë për një bombol gazi, por tashmë duhet të presim konfirmimin nga shërbimet zjarrfikëse dhe grupet e specializuara që po vijnë nga Tirana, për të përcaktuar nëse kemi pasur të bëjmë me zjarr apo me një shkak tjetër. Pas shuarjes së zjarrit do të kemi një informacion më të qartë dhe do të mund të sqarojmë më tej rrethanat e ngjarjes”, u shpreh drejtori i Policisë.
Ndërkohë, operacioni në vendngjarje vijon, ndërsa autoritetet pritet të japin më shumë detaje pasi të përfundojnë ndërhyrjet dhe ekspertimet për përcaktimin e shkakut të shpërthimit.