Mjetet e inteligjencës artificiale të Google do të mbeten të çaktivizuara si parazgjedhje në llogaritë e nxënësve të arsimit parauniversitar. Pas kritikave mbi përdorimin e kësaj teknologjie dhe ndikimin e saj në mësim, kompania amerikane po heq dorë nga aktivizimi automatik, duke ua lënë shkollave vendimin për ta lejuar atë.
Rregullat e reja përfshijnë Gemini dhe funksionet e tij brenda Google Classroom. Zbatimi do të nisë në Shtetet e Bashkuara e më pas do të shtrihet në mbarë botën, por Google ende nuk ka caktuar një datë. Administratorët e shkollave do të përcaktojnë nëse nxënësit do të kenë mundësi ta përdorin inteligjencën artificiale gjatë procesit mësimor.
Të lidhura
None found
Megjithatë, për shkollat që vendosin ta bllokojnë këtë teknologji, masa sjell edhe humbjen e qasjes në Google Search për nxënësit që përdorin llogari shkollore. Kjo lidhet me përfshirjen e funksioneve të inteligjencës artificiale në motorin e kërkimit, një kusht që ka nxitur kundërshtime të forta në Shtetet e Bashkuara.
Zohran Mamdani, kryebashkiaku i Nju Jorkut, ka akuzuar Google se po shfrytëzon dominimin në treg për t’ua imponuar inteligjencën artificiale shkollave publike. Ai ka theksuar se asnjë kompani nuk duhet të ketë autoritetin të përcaktojë se si arsimohen fëmijët. Çështja ka mbërritur edhe në Kongresin amerikan, ku dy senatorë i kanë kërkuar kompanisë sqarime rreth aktivizimit automatik të funksioneve të inteligjencës artificiale në pajisjet e shkollave.
Platforma Google Classroom përdoret nga më shumë se 150 milionë nxënës në të gjithë botën. Gjatë muajit gusht, Google e kishte zgjeruar përdorimin e Gemini, duke vënë në dispozicion të nxënësve mbështetje për detyrat, udhëzues për studim, teste praktike dhe materiale të përshtatura për ta.
Frika se kjo teknologji mund t’u shërbejë nxënësve për të anashkaluar të nxënit ka çuar në kufizime nga disa prej distrikteve më të mëdha shkollore në Shtetet e Bashkuara, mes tyre ato të Nju Jorkut dhe Los Anxhelosit. Në mbrojtje të ndryshimeve, Google ka deklaruar se ato synojnë t’u sigurojnë shkollave më shumë kontroll mbi përdorimin e teknologjisë.
