Presidenti i Rusisë, Vladimir Putin, i ka ndarë personalisht Medaljen Pushkin ministrit për Zhvillim Shkencor dhe Teknologjik, Arsimin e Lartë dhe Shoqërinë Informative të Republika Srpskas, Drago Mastiloviq.
Ceremonia e dekorimit është mbajtur në Kremlin, në Moskë, ndërsa medalja i është ndarë Mastiloviqit për kontributin e tij në forcimin e lidhjeve kulturore, arsimore dhe shkencore ndërmjet Republika Srpskas dhe Federatës Ruse.
Pas ceremonisë, Mastiloviq e ka cilësuar dekoratën si nder personal dhe vlerësim për bashkëpunimin afatgjatë ndërmjet Banjallukës dhe Moskës. Ai ka falënderuar Putinin dhe ambasadorin rus në Bosnjë e Hercegovinë, Igor Kalabukhov, për mbështetjen në zhvillimin e marrëdhënieve dypalëshe.
Dekorimi i ministrit vjen në vazhdën e marrëdhënieve të afërta që udhëheqësia e Republika Srpskas ka mbajtur me Moskën, veçanërisht gjatë udhëheqjes së Milorad Dodikut, i cili ka zhvilluar disa takime me Putinin dhe ka shprehur publikisht mbështetje për politikat e Kremlinit.
Lidhur me këtë zhvillim ka reaguar politologu boshnjako-amerikan, Jasmin Mujanoviq, i cili ka tërhequr vëmendjen te kontrasti mes afrimit të bashkëpunëtorëve të Dodikut me Rusinë dhe zhvillimeve në raportet e tyre me Shtetet e Bashkuara të Amerikës.
Mujanoviq ka shkruar se Dodiku, të cilin e ka cilësuar si udhëheqës secesionist të mbështetur nga Rusia dhe Kina, është duke shkuar drejt Mar-a-Lagos, ndërsa njëri prej bashkëpunëtorëve të tij më të lartë po nderohet nga Putini në Moskë.
Ai ka kërkuar rikthimin e sanksioneve ndaj Dodikut dhe personave të tjerë të lidhur me të.
“Rikthimi i sanksioneve ndaj Dodikut dhe të tjerëve nuk është vetëm një prioritet politik për interesat strategjike të SHBA-së në Ballkanin Perëndimor. Është një domosdoshmëri morale”, ka shkruar Mujanoviq.
Reagimi i politologut vjen në kohën kur ndikimi rus në Ballkanin Perëndimor dhe raportet e udhëheqjes së Republika Srpskas me Moskën vazhdojnë të jenë çështje e debatit politik dhe diplomatik.