Një rekord botëror me 53 kartonë të kuq në një ndeshje të vetme; ky është bilanci i sherrit të shpërthyer në gjysmëfinalen e parë të Kampionatit U20 të shtetit brazilian Minas Gerais mes Uberlandia dhe Mamore.
Një sfidë kjo, që u mbyll në kaos dhe me dëme të konsiderueshme të dhomave të zhveshjes në stadiumin Parque do Sabia. Lajmi bëri xhiron e botës dhe ngjalli kureshtjen edhe të mediave angleze që i dedikuan një hapësirë të konsiderueshme këtij momenti.
‘Në total-shkruan BBC-u ndëshkuan me karton të kuq 43 futbollistë dhe 8 anëtarë të stafeve teknike dhe këtyre iu shtohen edhe dy drejtues të Uberlandia’.
Sipas raportit arbitrar, shkëndija u ndez në pjesën e dytë pas golit që e çoi rezultatin në 3-1 për Mamore, kur futbollisti Davi provokoi pankinën kundërshtare gjatë festimeve. Trajneri i portierëve të Uberlandia hyri në fushë për t’u përballur me të duke nisur një sherr masiv. Ndeshja, që fillimisht u pezullua për 40 minuta, u ndërpre përfundimisht nga arbitri, pasi ishte e pamundur që të garantohej siguria.
Policia ushtarake dokumentoi 14 porta të dëmtuara, dushe dhe dritare të thyera si dhe stola, tavolina dhe ulëse të shkatërruara. Rekordi i mëparshëm botëror ka qenë me 36 kartonë të kuq që u regjistrua në 2011 në një ndeshje të divizionit të pestë të futbollit argjentinas. Më pas Uberlandia hoqi dorë nga zhvillimi i ndeshjes së dytë gjysmëfinale duke i dhënë mundësinë Mamore që mbeti me 7 lojtarë të disponueshëm që të kalojë në finale, një vendim ky që u përkufizua nga klubi si një veprim korrekt.
Top Channel
