Kanë punuar për dekada në Greqi, kanë paguar rregullisht sigurimet shoqërore, por kur mbërrijnë në moshën e pensionit, shumë emigrantë shqiptarë zbulojnë se përfitimi i tyre është më i ulët nga sa prisnin. Çështja është rikthyer në debatin publik grek, pas një përplasjeje mes një gazetari dhe zëdhënësit të qeverisë. Videoja e debatit, e cila ka regjistruar mbi 1 milion e 200 mijë shikime, ka rihapur diskutimin për një ligj që partitë e majta e cilësojnë të padrejtë, madje edhe diskriminues. Në qendër të debatit është ligji i vitit 2016, i njohur si ligji Katrugalos. Sipas tij, për të përfituar të plotë pjesën kombëtare të pensionit, kërkohen 40 vite qëndrimi të ligjshëm dhe të përhershëm në Greqi. Për çdo vit që mungon, kjo pjesë e pensionit ulet me një të dyzetën. Dhe pikërisht këtu nis problemi për mijëra shqiptarë.