Mesfushori 20-vjeçar Demir Xhemalija i ka dhënë përgjigje pozitive përzgjedhësit Hekuran Kryeziu dhe pritet t’i bashkohet Kosovës U21 që nga grumbullimi i ardhshëm.
Xhemalija është vlerësuar lart në Zvicër, të cilën e ka përfaqësuar në çdo grupmoshë nga U16 deri në U20. Gjatë kësaj periudhe, ai ka mbajtur shpesh edhe shiritin e kapitenit.
Të lidhura
None found
Megjithatë, lidhja me Kosovën e shtyu të vendoste që në nivel ndërkombëtar të luajë për “Dardanët”. Në një intervistë ekskluzive për Telegrafin, ai foli për herë të parë për zgjedhjen e tij.
Xhemalija tha se vendimi ka rëndësi të madhe për të: rrënjët i ka në Kosovë, prindërit e tij janë rritur atje dhe familja e ka prejardhjen nga Kosova. Ai pranoi se nuk e pati të lehtë të linte pas përfaqësimin e Zvicrës, ku kishte kaluar pothuajse të gjitha grupmoshat dhe kishte marrë përgjegjësi si kapiten.
Sipas tij, këtë hap e shqyrtoi me njerëzit e afërt përpara se të vendoste me zemër. Xhemalija u shpreh mirënjohës për gjithçka që i ka dhënë Zvicra dhe tha se do t’i mbetet gjithmonë mirënjohës.
Sa u përket synimeve me Kosovën U21, lojtari i Luzernit dëshiron fillimisht të njohë bashkëlojtarët dhe të përshtatet sa më shpejt me ekipin. Më pas, synon të vazhdojë përmirësimin si futbollist dhe të japë çdo ditë maksimumin për ta ndihmuar skuadrën.
Xhemalija ka objektiva edhe në klub: të sigurojë vend në ekipin e parë të Luzernit, të luajë sa më shumë minuta në elitën e futbollit zviceran dhe të hedhë hapin e radhës në karrierë. Ai tha se ndihet gati për debutimin në Superligën e Zvicrës dhe se do të ishte shumë i lumtur të merrte minuta atje.
Njëkohësisht, ai theksoi se është ende i ri dhe se stërvitja e palodhshme, së bashku me përvojën e rregullt në ndeshje, janë thelbësore për zhvillimin e tij. Xhemalija beson se puna do të shpërblehet dhe u shpreh se luan kudo ku ka nevojë ekipi, duke dhënë gjithmonë maksimumin.
Këtë edicion, ai ka regjistruar tetë paraqitje me ekipin e dytë të Luzernit. Përveç rolit të tij kryesor si mesfushor me tipare mbrojtëse, është aktivizuar edhe si mbrojtës i krahut të djathtë dhe si qendërmesfushor.
