Pas më shumë se dy dekadash me fanellën e Portugalisë, Cristiano Ronaldo ka mbyllur kapitullin e tij me kombëtaren, duke lënë pas një trashëgimi të jashtëzakonshme dhe një pyetje që po diskutohet mes tifozëve: kush do ta veshë tani fanellën ikonike me numrin 7?
Përmes një videoje lamtumire të publikuar në llogaritë e tij zyrtare këtë të enjte, ylli portugez njoftoi tërheqjen nga futbolli ndërkombëtar. Mesazhi i tij ishte simbolik, duke ia lënë numrin 7 brezit të ri dhe duke e rikthyer atë te kombëtarja.
“Ka ardhur dita për t’ia kthyer fanellën me numrin 7 kombëtares sonë, ne të gjithëve”, deklaroi Ronaldo, duke i dhënë fund një rrugëtimi që nisi në vitin 2003. Ndeshja kundër Uellsit, në shtator, shënoi paraqitjen e tij të fundit me Portugalinë.
Por, ndryshe nga sa mund të dëshironin shumë tifozë, numri 7 nuk do të tërhiqet përfundimisht në nder të tij.
Kush do ta trashëgojë numrin 7?
Në fakt, fanella ka nisur të përdoret nga futbollistë të tjerë edhe në mungesë të Ronaldos. Gjatë grumbullimeve të mëparshme, këtë numër e kanë mbajtur emra si Nani, Ricardo Quaresma, Fábio Coentrão, André Silva, Bruma, Ricardo Horta dhe Miguel Veloso.
Një tjetër shembull është Rafael Leao, i cili mori fanellën me numrin 7 gjatë grumbullimit të fundit, pasi Ronaldo u largua nga kampi përpara ndeshjes me Danimarkën.
Sipas gazetës portugeze “Record”, rregulloret e UEFA-s kërkojnë që kombëtaret të dorëzojnë listën përfundimtare të lojtarëve dhe numrat përkatës përpara ndeshjeve zyrtare. Për këtë arsye, numrat nuk mund të lihen të papërdorur në mënyrë arbitrare.
Pse FIFA nuk lejon tërheqjen e numrit 7?
Pengesa kryesore për një tërheqje simbolike të fanellës vjen nga rregullat e FIFA-s, të cilat nuk lejojnë rezervimin përfundimtar të numrave në kombëtaret e meshkujve.
Kjo do të thotë se, pavarësisht kontributit të jashtëzakonshëm të Ronaldos, Portugalia nuk mund ta heqë numrin 7 nga përdorimi në ndeshjet zyrtare.
Ideja për ta tërhequr këtë fanellë ishte hedhur më herët edhe nga ish-futbollisti portugez Paulo Futre. Gjatë një ceremonie të ndarjes së çmimeve të Fondacionit të Sportit, ai kishte propozuar që numri 7 të mos mbahej më nga asnjë lojtar, si një mënyrë për të nderuar legjendën portugeze.
“Nëse do të isha në federatën e futbollit, do ta tërhiqja fanellën me numrin 7. Cristiano duhet të largohet me nderimet më të mëdha”, ishte shprehur Futre.
Megjithatë, ky propozim nuk mund të zbatohet për shkak të rregullave ndërkombëtare. Ndryshe nga klubet, të cilat mund të tërheqin numrat e fanellave në nder të futbollistëve të tyre legjendarë, kombëtaret duhet të respektojnë rregullat e FIFA-s.
Kështu, numri 7 do të vazhdojë të jetë pjesë e Portugalisë, por pa njeriun që e ktheu atë në një simbol të futbollit portugez.
