Ferencvaroshi ka shkaktuar një surprizë të madhe në Ligën e Europës, duke mposhtur Milanin me rezultatin 2-0 në “San Siro”. Skuadra hungareze vazhdon ecurinë perfekte në këtë kompeticion, ndërsa për kuqezinjtë kjo humbje komplikon ndjeshëm objektivin për të siguruar kualifikimin.

Pjesa e parë foli më shumë për miqtë, të cilët krijuan disa raste të rrezikshme, kryesisht nëpërmjet Lenny Joseph. Sulmuesi nga Haiti vuri disa herë në vështirësi mbrojtjen italiane, por nuk arriti të gjente rrugën e rrjetës. Në krahun tjetër, Milani zhgënjeu me lojën e tij dhe nuk arriti të shfaqte thuajse asgjë nga potenciali ofensiv.

Situata u përkeqësua për vendasit në minutën e 52-të. Një gabim i rëndë i Koni De Winter në pasimin drejt portierit Lorenzo Torriani u shfrytëzua nga Kristoffer Zachariassen, i cili asistoi për Joseph. Ky i fundit nuk e pati të vështirë të dërgonte topin në rrjetën e boshatisur.

Në minutën e 67-të, dy protagonistët bashkëpunuan sërish. Zachariassen organizoi një kundërsulm të shpejtë dhe, në vend që të tentonte vetë portën, shërbeu për Joseph, i cili realizoi golin e dytë personal dhe vulosi fitoren 2-0.

Ferencvaroshi mbeti me një lojtar më pak në minutat e fundit, pas kartonit të kuq të Dele, por arriti ta ruante avantazhin falë edhe ndërhyrjeve të portierit Denes Dibusz.

Kjo ishte fitorja e tretë radhazi e hungarezëve në fazën e ligës dhe e katërta radhazi në kompeticionet madhore europiane, një seri që nuk e kishin regjistruar që nga viti 1968. Ndërkohë, Milani pëson një tjetër goditje, duke zbritur jashtë zonës së 24 skuadrave të para, në atë që cilësohet si nisja më e dobët europiane e klubit në këtë format.