Një prej kapitujve më të rëndësishëm të futbollit ndërkombëtar ka marrë fund. Cristiano Ronaldo ka njoftuar tërheqjen nga kombëtarja e Portugalisë, duke i dhënë fund një rrugëtimi 23-vjeçar me fanellën që mbajti për herë të parë në vitin 2003.

Në një video-mesazh të publikuar në rrjetet sociale, 41-vjeçari iu drejtua tifozëve portugezë, duke konfirmuar se ka ardhur momenti për t'ia lënë fanellën me numrin 7 brezave të ardhshëm.

“Për popullin portugez, ka ardhur dita që t'ia kthej kombëtares sonë fanellën me numrin 7. Nuk e kam ndjerë kurrë se më përkiste vetëm mua, por për 23 vite pata privilegjin dhe përgjegjësinë ta vishja, ta mbroja dhe ta mbaja me vete në stadiumet e gjithë botës”, u shpreh Ronaldo.

Ai pranoi se vendimi nuk ka qenë i lehtë, pasi për të nuk bëhet fjalë vetëm për një zgjedhje sportive, por edhe emocionale. Gjatë karrierës me Portugalinë, Ronaldo ka regjistruar 234 ndeshje dhe 146 gola, duke u bërë golashënuesi më i mirë në historinë e futbollit për kombëtaret.

Me Portugalinë, ai fitoi Kampionatin Europian në vitin 2016, ndërsa mori pjesë në gjashtë edicione të Kupës së Botës. Një rrugëtim që nisi përpara Euro 2004 dhe që e shndërroi atë në një prej figurave më të rëndësishme të historisë së futbollit portugez.

Lamtumira vjen pas tensioneve të fundit me trajnerin Jorge Jesus. Pas ndeshjes së 24 shtatorit ndaj Uellsit, të fituar 1-0 nga Portugalia, Ronaldo mbeti në stol në takimin pasardhës dhe, pasi mësoi se nuk do të ishte titullar as në ndeshjen e radhës, vendosi të largohej nga grumbullimi i ekipit.

Federata Portugeze e Futbollit reagoi me një mesazh falënderimi dhe vlerësimi për kontributin e tij, duke e cilësuar Ronaldon si një lojtar që ka rritur imazhin e Portugalisë dhe ka frymëzuar breza të tërë të rinjsh. Gjithashtu, bëri të ditur se synon të organizojë një ceremoni të veçantë për ta nderuar, ku tifozët të kenë mundësinë ta duartrokasin edhe një herë.

Megjithatë, Ronaldo nuk po i jep fund futbollit. Ai do të vazhdojë karrierën në nivel klubesh me Al-Nassr në Arabinë Saudite, ndërsa ka ende një objektiv të madh përpara: arritjen e 1000 golave në karrierë. Aktualisht, ylli portugez numëron 985 gola.