Analizë, kush mund të jetë pas kërcënimeve të rreme me bomba ndaj udhëtimeve ajrore evropiane?

Të paktën 21 fluturime dhe disa aeroporte në vende të ndryshme të Evropës u përballën të enjten me kërcënime për vendosjen e bombave, duke shkaktuar shqetësim dhe masa të shtuara sigurie në transportin ajror.

Kërcënimet mbërritën në mënyrë të njëpasnjëshme, duke vënë në shënjestër linja të ndryshme ajrore dhe aeroporte. Në shumicën e rasteve, autoritetet i konsideruan ato mjaftueshëm serioze për të devijuar avionët drejt aeroporteve të tjera. Në Itali, situata shkoi deri në ngritjen e avionëve luftarakë për të shoqëruar një avion të dyshuar.

Pas verifikimeve, të gjitha kërcënimet rezultuan të rreme. Megjithatë, koordinimi dhe përmasat e këtyre incidenteve kanë ngritur pikëpyetje mbi autorët dhe motivet e tyre.

Sipas një analize të BBC, vëmendja është përqendruar te Rusia, në një kohë kur Evropa po përballet me një sërë incidentesh të dyshimta, përfshirë sulme kibernetike, shfaqje dronësh pranë objekteve strategjike dhe ndërhyrje në infrastrukturë të rëndësishme.

Gjatë muajve të fundit janë raportuar incidente të ndryshme, nga hakimi i pajisjeve frigoriferike në supermarkete dhe i sistemeve të një banke gjaku, deri te ngjarje të dyshimta në kufirin polako-rus. Gjithashtu, në gusht, një sulm me dronë në aeroportin Leipzig/Halle në Gjermani u pasua nga akuza publike të ministrit të Brendshëm gjerman ndaj Moskës.

BBC nënvizon se këto zhvillime kanë rikthyer në vëmendje mundësinë e një lufte hibride, përmes së cilës shtetet synojnë të dëmtojnë infrastrukturën dhe të krijojnë pasiguri në vendet kundërshtare, pa kaluar në një konflikt të drejtpërdrejtë ushtarak.

Megjithatë, deri të enjten në mbrëmje thuhet se nuk kishte prova konkrete që të lidhnin kërcënimet ndaj fluturimeve me Rusinë, Iranin apo grupe të tjera të lidhura me ta.

Një nga pistat që po shqyrtohet lidhet me një email kërcënues të dërguar të enjten në mëngjes autoriteteve të aeroportit të Romës, i cili pretendohej se ishte nënshkruar nga grupi “Luftëtarët e Shtetit Mashkullor”.

Ky emër dyshohet se mund t’i referohet grupit rus ultra të djathtë “Muzhskoi Legion”, i njohur gjithashtu si “Male Legion”. Organizata u ndalua nga një gjykatë në Moskë në vitin 2021, për shkak të ideologjisë së saj ekstremiste, por vazhdoi të kishte një numër të konsiderueshëm ndjekësish në platformën Telegram dhe të shprehte mbështetje për pushtimin rus të Ukrainës.

Megjithatë, autoritetet nuk kanë konfirmuar autenticitetin e emailit dhe as lidhjen e tij me grupin në fjalë. Nuk përjashtohet mundësia që emri të jetë përdorur nga persona të tjerë për të fshehur identitetin e vërtetë të autorëve.

Për momentin, mbetet e paqartë se kush qëndron pas valës së kërcënimeve dhe nëse bëhet fjalë për një operacion të koordinuar me prapavijë politike apo për veprime të pavarura. Hetimet pritet të përcaktojnë origjinën e mesazheve dhe motivet e personave përgjegjës.