Kreu i Partisë Demokratike, Sali Berisha, ka kundërshtuar argumentin se rritja e numrit të turistëve është një nga faktorët kryesorë që ka ndikuar në zhvlerësimin e euros në Shqipëri. Përmes një grafiku të publikuar dhe një deklarate për mediat, ai pretendon se rënia e monedhës evropiane lidhet me hyrjen në ekonomi të parave nga aktiviteti kriminal, veçanërisht nga trafiku i drogës.
Për të mbështetur argumentin e tij, Berisha krahasoi numrin e turistëve dhe kursin e këmbimit në vitet 2007 dhe 2022. Sipas shifrave që paraqiti, në vitin 2007 Shqipëria priti rreth 1.8 milionë turistë, ndërsa një euro këmbehej me rreth 120 lekë. Në vitin 2022, kur numri i turistëve, sipas statistikave zyrtare që ai citoi, arriti në rreth 9 milionë, euroja këmbehej me rreth 127 lekë.
Duke iu referuar këtij krahasimi, kreu i PD-së argumentoi se rritja e numrit të turistëve nuk shpjegon zhvlerësimin e euros në vitet e fundit. Ai akuzoi qeverinë dhe institucionet financiare se po përdorin turizmin si shpjegim për të shmangur vëmendjen nga ajo që e cilësoi si fenomeni i “narko-euros”.
Berisha u ndal veçanërisht te periudha nga viti 2022 e në vijim, gjatë së cilës euroja ka shënuar rënie të mëtejshme në raport me lekun. Sipas tij, kjo lidhet me zgjerimin e aktivitetit të karteleve shqiptare të drogës në tregun evropian të kokainës dhe me paratë që, pretendon ai, futen në ekonominë shqiptare.
“Me gjithë 9 milionë turistë në Shqipëri, euro konvertohej me 127 lekë, pra ishte më e fuqishme sesa në vitin 2007, kur ajo konvertohej me 120 lekë”, deklaroi Berisha.
Ai iu drejtua gjithashtu guvernatorit dhe bordit të Bankës së Shqipërisë, duke i pyetur nëse do të vazhdojnë ta shpjegojnë zhvlerësimin e euros me fluksin turistik. Berisha e cilësoi këtë zhvillim si shqetësues për ekonominë dhe shoqërinë shqiptare, ndërsa akuzoi institucionet për heshtje përballë tij.
“Heshtja para këtij krimi monstruoz ndaj ekonomisë dhe xhepave të shqiptarëve është bashkëfajësi, është mbështetje për këtë zhvillim”, përfundoi kreu i PD-së.
