Për të gjetur Adnon Jasharin, Policia e Kosovës u është drejtuar qytetarëve me një apel për bashkëpunim. Ai kërkohet nga drejtësia për veprën penale “Vrasje e rëndë”, në lidhje me vrasjen e Diana Kastratit më 18 maj 2011 në Prishtinë.
I akuzuar për vrasjen e ish-partneres së tij, Jashari është në arrati prej vitit 2011. Gjykata Themelore në Prishtinë i ka kërkuar të dorëzohet dhe të dalë para drejtësisë.
Të lidhura
None found
Në njoftimin policor sqarohet se apeli për ndihmën e qytetarëve mbështetet në urdhëresën e Gjykatës, e cila ka caktuar datën 10 nëntor 2026 për zhvillimin e seancës gjyqësore.
Ngjarja që i mori jetën Diana Kastratit në kryeqytet 15 vjet më parë shkaktoi tronditje në opinionin publik. Përpara se të vritej, ajo u ishte drejtuar institucioneve për të kërkuar mbrojtje.
Kushdo që ka të dhëna për vendndodhjen e Adnon Jasharit ftohet nga Policia e Kosovës t’i përcjellë ato në adresën elektronike [email protected] ose të shkojë në stacionin policor më të afërt.
Deri në marrjen e një vendimi përfundimtar nga gjykata, për të akuzuarin vlen prezumimi i pafajësisë.
