Një video e shkurtër me simbolin e syrit brenda një cope akulli që shkrihet ka rikthyer vëmendjen te reality show më i ndjekur në Shqipëri. Mesazhi “Së shpejti” ka shtuar pritshmëritë e fansave për sezonin e ri.
Big Brother VIP Albania ka dhënë sinjalet e para për rikthimin në ekran me edicionin e gjashtë. Faqja zyrtare e spektaklit ka publikuar një video promovuese, duke ngjallur menjëherë interesin dhe diskutimet në rrjetet sociale.
Në promon e publikuar shfaqet simboli karakteristik i formatit, syri vëzhgues, i vendosur brenda një cope akulli që nis të shkrihet ngadalë. Videoja shoqërohet me mbishkrimin e shkurtër “Së shpejti”, një mesazh që ka mjaftuar për të rikthyer entuziazmin e fansave.
Publikimi ka shtuar kureshtjen për atë që pritet të sjellë sezoni i gjashtë, ndërsa ndjekësit kanë nisur të spekulojnë mbi emrat e mundshëm të banorëve, risitë e formatit dhe datën e nisjes së spektaklit.
Për momentin, produksioni nuk ka zbuluar detaje konkrete mbi kastin apo datën zyrtare të premierës.
Megjithatë, mesazhi i publikuar lë të kuptohet se përgatitjet për Big Brother VIP Albania 6 kanë hyrë në një fazë të re dhe rikthimi i spektaklit mund të jetë më pranë nga sa pritet.