Pas shkarkimit të Vlora Hysenit, Rama propozon Esmeralda Hasanin në krye të SHISH

Esmeralda Hasani është propozuar nga kryeministri Edi Rama për të marrë drejtimin e Shërbimit Informativ të Shtetit, duke zëvendësuar Vlora Hysenin, e cila ndodhet në arrest shtëpie me akuzat e ngritura nga SPAK.

Sipas burimeve të Infopress Al, propozimi i Ramës i është përcjellë Presidentit të Republikës, ndërsa emërimi nuk është bërë ende publik zyrtarisht.

Hasani është juriste dhe eksperte e projekteve, me përvojë në administratën qeveritare, institucionet akademike dhe bashkëpunimin ndërkombëtar. Ajo njihet gjithashtu si mike e Vlora Hysenit, e cila e kishte emëruar pak kohë më parë në pozicionin e shefes së Departamentit Mbështetës në SHISH.

Ky zhvillim merr një rëndësi të veçantë për shkak të situatës së krijuar rreth drejtueses aktuale të institucionit. SPAK e akuzon Hysenin për nxjerrje të sekreteve shtetërore dhe bashkëpunim me Ergys Agasin. Sipas hetimeve, komunikimet telefonike kanë evidentuar kontakte të vazhdueshme mes tyre, edhe në kohën kur Agasi ishte në kërkim.

Kush është Esmeralda Hasani?

Hasani ka ndërtuar një karrierë që ndërthur të drejtën europiane, mësimdhënien universitare, drejtimin e instituteve dhe këshillimin pranë institucioneve qeveritare.

Ajo prezantohet si konsulente e lartë pranë Zyrës së Kryeministrit për planifikimin e projekteve dhe sigurimin e financimeve. Është diplomuar në të drejtën ndërkombëtare në Milano dhe ka kryer studime pasuniversitare në planifikimin dhe zhvillimin e projekteve në Bruksel.

Në periudhën 2015–2019 ka drejtuar Institutin për Kërkim dhe Zhvillim Barleti, ndërsa më pas ka marrë drejtimin e Institutit Adriapol, i fokusuar në kërkime, projekte arsimore dhe iniciativa zhvillimi.

Hasani ka pasur gjithashtu angazhime në administratën qeveritare. Gjatë viteve 2017–2018 ka shërbyer si këshilltare dhe shefe kabineti pranë ministrit të Shtetit për Diasporën, duke kontribuar në projekte për përfshirjen e diasporës shqiptare në zhvillimin ekonomik dhe social të vendit.

Emri i saj figuron edhe në strukturat drejtuese të Agjencisë Kombëtare të Diasporës, ku ishte emëruar në vitin 2018 si përfaqësuese e ministrit të Shtetit për Diasporën.

Në fushën studimore, ajo ka qenë bashkautore e një studimi të publikuar në janar 2023 mbi kuadrin ligjor dhe institucional shqiptar për luftën kundër ekstremizmit të dhunshëm në hapësirën kibernetike.

Sipas procedurës ligjore, drejtuesi i SHISH-it emërohet nga Presidenti i Republikës, me propozimin e Kryeministrit. Nëse propozimi i Ramës miratohet, Esmeralda Hasani do të marrë drejtimin e një prej institucioneve më të rëndësishme të sigurisë kombëtare, në një moment delikat për Shërbimin Informativ të Shtetit.