Sulmet ajrore ruse gjatë natës kanë shkaktuar dëme në infrastrukturën energjetike dhe civile të Ukrainës, duke lënë pesë persona të plagosur në kryeqytetin Kiev, mes tyre edhe një fëmijë. Autoritetet raportuan gjithashtu dëmtime në një urë dhe ndërprerje të furnizimit me energji, ngrohje dhe ujë në disa zona të qytetit.
Kryebashkiaku i Kievit, Vitali Klitschko, bëri të ditur se infrastruktura energjetike në rajonet e Kievit dhe Zhytomyr ishte dëmtuar gjatë sulmit. Ai e cilësoi situatën e furnizimit me energji në kryeqytet si “jashtëzakonisht të vështirë”, duke paralajmëruar për probleme edhe në sistemet e ngrohjes dhe furnizimit me ujë.
Mes objekteve të dëmtuara është edhe Ura Pivnichnyi, e cila u mbyll për trafikun në të dyja drejtimet, ndërsa specialistët nisën vlerësimin e gjendjes së saj.
Klitschko publikoi më vonë një video nga ura, duke shpjeguar se dëmtime kishte pësuar sipërfaqja e saj, si dhe linjat ajrore të trolejbusëve dhe ato të energjisë elektrike. Nga vala e shpërthimit u dëmtuan gjithashtu pesë automjete të parkuara pranë saj.
Ndërkohë, presidenti ukrainas Volodymyr Zelenskyy paralajmëroi për sulme të tjera ruse ndaj sektorit energjetik dhe infrastrukturës civile. Ai përsëriti thirrjen drejtuar aleatëve për të përshpejtuar dërgesat e raketave interceptuese Patriot, veçanërisht përpara dimrit.
“Taktikat e Rusisë synojnë shkatërrimin e rrjeteve të energjisë, transformatorëve dhe pajisjeve shpërndarëse. Kjo është arsyeja pse, edhe kur kemi kapacitet të mjaftueshëm gjenerues, disa rajone për fat të keq ende përballen me mungesa”, deklaroi Zelenskyy në një video të publikuar në rrjetet sociale.
Departamenti Amerikan i Shtetit ka njoftuar së fundmi miratimin e një pakete raketash interceptuese Patriot PAC-3 për Ukrainën, me vlerë 2.1 miliardë dollarë. Megjithatë, Zelenskyy ka paralajmëruar se dërgesat mund të zgjasin me vite, duke kërkuar që aleatët të përshpejtojnë procesin.
Sistemi Patriot konsiderohet ndër më të avancuarit në botë për mbrojtjen ajrore dhe mund të përdoret kundër një sërë kërcënimesh, përfshirë avionët dhe raketat balistike.
Rusia ka shënjestruar vazhdimisht rrjetin elektrik ukrainas që prej nisjes së pushtimit në shkallë të plotë në shkurt të vitit 2022, duke intensifikuar sulmet ndaj infrastrukturës energjetike gjatë periudhave të dimrit.
Në fjalimin e tij të së premtes, Zelenskyy bëri të ditur gjithashtu se kishte zhvilluar bisedime me ekipin përgjegjës për menaxhimin e operacioneve të sulmeve ukrainase në thellësi të territorit rus. Ai paralajmëroi se Moska do të merrte përgjigjen e Ukrainës.
