Qyteti i Kukësit është përfshirë nga mjegulla që prej mëngjesit të sotëm. Fillimisht e pranishme në zonat e ulëta dhe përgjatë luginave, ajo është përhapur gradualisht edhe në pjesën tjetër të qytetit, si dhe në njësitë administrative përreth.
Kushtet më të vështira për drejtuesit e mjeteve paraqiten në aksin e Rrugës së Kombit, konkretisht në segmentin Pobreg-Kolsh, ku dendësia e mjegullës kufizon ndjeshëm shikueshmërinë.
Për të shmangur situatat e rrezikshme në rrugë, drejtuesit e automjeteve duhet të lëvizin me shpejtësi të reduktuar, të mbajnë hapësirën e nevojshme mes mjeteve dhe të jenë veçanërisht të vëmendshëm gjatë udhëtimit.
Edhe pse bëhet fjalë për një dukuri të zakonshme në zonën e Kukësit gjatë muajve të vjeshtës, sidomos në orët e para të mëngjesit, prania e mjegullës në akset kryesore mbetet një faktor që kërkon kujdes të shtuar nga drejtuesit e mjeteve.