Goditje e fortë ndaj krimit në Gjermani, arrestohet në karrocë me rrota drejtuesi i grupit “Hells Angels”

Policia e Hamburgut ka arrestuar një figurë të lartë të grupit kriminal Hells Angels, gjatë një operacioni të gjerë kundër krimit të organizuar të armatosur, pas disa muajsh përplasjesh me armë mes bandave.

Motoristi, i identifikuar nga mediat gjermane si Dariusch “Dari” F., ndodhej në sediljen e pasme të një automjeti luksoz Mercedes-Maybach, kur efektivët ndërhynë dhe ndaluan tre automjete luksoze gjatë një shkëmbimi të dyshuar parash në qendër të Hamburgut, të premten në mbrëmje.

Gjatë kontrollit, policia gjeti një armë zjarri të mbushur me fishekë dhe 23 mijë euro. Në operacion u ndaluan pesë persona.

Dari, i cili përdor një karrige me rrota pasi i mbijetoi një atentati me armë zjarri gjatë përplasjes mes grupeve Hells Angels dhe Mongols në vitin 2018, u vu në pranga.

Dy persona të tjerë, të cilët sipas raportimeve mediatike kanë lidhje me Hells Angels, u arrestuan në zonën HafenCity, ku efektivët sekuestruan edhe një armë tjetër zjarri të mbushur me fishekë.

Ky ishte operacioni i parë i madh i njësisë speciale Soko Kinesis, e krijuar për të luftuar dhunën e kohëve të fundit me armë zjarri në Hamburg, përfshirë edhe një vrasje të dyfishtë të ndodhur në shtator në zonën St. Pauli.