Partia Likud e kryeministrit izraelit Benjamin Netanyahu po përgatitet të kundërshtojë në gjykatë rezultatet e zgjedhjeve të fundit parlamentare, duke pretenduar se partitë arabe kanë shkelur rregullat zgjedhore përmes përdorimit të aplikacioneve elektronike për monitorimin e pjesëmarrjes së votuesve.
Avokati i Likud, Ilan Bombach, deklaroi për gazetën “Times of Israel” se përfaqësuesit e partisë kanë paraqitur rreth 700 ankesa gjatë ditës së zgjedhjeve.
Sipas pretendimeve të partisë, aktivistë të forcave politike arabe kanë përdorur aplikacione në telefonat celularë për të ndjekur pjesëmarrjen në qendrat e votimit, pavarësisht një vendimi të Gjykatës Supreme që ndalonte këtë praktikë.
Bombach pretendon se këto veprime mund të kenë ndikuar në rezultatin zgjedhor, duke u dhënë partive arabe një avantazh të padrejtë dhe duke prekur potencialisht qindra apo mijëra vota.
Sipas avokatit, ende nuk është përcaktuar nëse ankimi do të kërkojë anulimin e të gjithë rezultatit zgjedhor apo do të kufizohet në disa aspekte të procesit të votimit.
Ankimi pritet të depozitohet në Gjykatën e Qarkut të Jerusalemit, por jo përpara 17 nëntorit, kur përfundon afati për paraqitjen e kundërshtimeve ligjore.
Ndërkohë, Likud po shqyrton mundësinë e përfshirjes në procesin gjyqësor edhe të hetimeve për mashtrime të mundshme zgjedhore, të cilat po zhvillohen nga autoritetet përkatëse.
Nga ana tjetër, organizata “Garda Civile e Zgjedhjeve”, e cila kishte angazhuar vëzhgues vullnetarë në qendrat e votimit, bëri të ditur se kishte dokumentuar 374 raste të dyshuara të përdorimit të paligjshëm të aplikacioneve për monitorimin e pjesëmarrjes së votuesve.
