2 të vdekur dhe disa të plagosur

Dy persona kanë humbur jetën dhe disa të tjerë janë plagosur sot në Kroaci, pasi një autobus me targa serbe u përmbys në autostradë.

Sipas autoriteteve kroate, aksidenti ndodhi në orën 07:25 të mëngjesit në autostradën A3, ndërsa autobusi po udhëtonte drejt kryeqytetit Zagreb. Mjeti doli nga rruga, theu gardhin mbrojtës dhe u përmbys anash.

Në autobus ndodheshin 33 pasagjerë dhe dy shoferë, bëjnë të ditur shërbimet e emergjencës.

Komandanti i zjarrfikësve të qarkut të Zagrebit, Dario Kezeric, deklaroi për transmetuesin shtetëror HRT se disa nga të plagosurit janë në gjendje të rëndë shëndetësore. Në vendngjarje u dërgua edhe një helikopter.

Fotot e publikuara nga mediat lokale tregojnë autobusin të shtrirë në anë të rrugës dhe gardhin e thyer rrugor.

Shkaqet e aksidentit nuk janë bërë ende të ditura. Autoritetet kroate kanë nisur hetimet.

Autostrada A3 nis nga kufiri me Serbinë, kalon nëpër Zagreb dhe vazhdon drejt Sllovenisë.