“Vetëm Zoti e di çfarë kemi kaluar”, bashkëshortja e Raphinhas përlot me dedikimin për yllin e Barcelonës

Bashkëshortja e Raphinhas, Natália Belloli, ka emocionuar me një dedikim të veçantë për futbollistin brazilian, pas rinovimit të kontratës së tij me Barcelonën deri në vitin 2030.

Përmes një mesazhi të publikuar në rrjetet sociale, ajo ka shprehur krenarinë dhe lumturinë për bashkëshortin e saj, duke kujtuar rrugëtimin dhe vështirësitë që kanë kaluar së bashku për të arritur deri në këtë moment të rëndësishëm.

“Vetëm Zoti e di gjithçka që kemi përjetuar dhe vështirësitë me të cilat jemi përballur për të arritur deri këtu. Të të shoh duke realizuar këtë ëndërr dhe duke shkruar një tjetër kapitull të historisë tënde në një klub që e do kaq shumë, ma mbush zemrën me krenari dhe lumturi”, shkruan Natália.

Ajo nuk ka harruar të vlerësojë këmbënguljen e sulmuesit brazilian, duke e falënderuar që nuk është dorëzuar kurrë dhe që ka vazhduar të besojë te ëndrrat e tyre.

“Faleminderit që nuk u dorëzove kurrë, që besove te ëndrrat tona dhe, mbi të gjitha, që luftove gjithmonë për ne. Zoti vazhdoftë të bekojë hapat e tu dhe të ndriçojë rrugën tënde. Ne të duam”, përfundon dedikimi i saj.

Nga dyshimet te rinovimi deri në vitin 2030

Raphinha ka kaluar një rrugëtim me ulje-ngritje që nga mbërritja te Barcelona në vitin 2022. Braziliani është kthyer në një prej figurave kryesore të skuadrës katalanase dhe ka fituar një rol të rëndësishëm në projektin e klubit.

Rinovimi i kontratës deri në vitin 2030 përfaqëson një tjetër moment të rëndësishëm në karrierën e tij, ndërsa mesazhi i bashkëshortes tregon se pas suksesit në fushë qëndron edhe mbështetja e familjes.

Një dedikim plot dashuri, mirënjohje dhe krenari për futbollistin që vazhdon të shkruajë historinë e tij me fanellën e Barcelonës.