Thumb për Ramën? Veliaj reagon sërish nga qelia për Tiranën: Puna nuk ndalet

Kryebashkiaku i Tiranës, Erion Veliaj, ka publikuar një tjetër reagim në rrjetet sociale nga burgu i Fierit, ku ndodhet prej 12 ditësh pas transferimit nga paraburgimi i Durrësit.

Këtë herë, Veliaj ka zgjedhur të përcjellë një mesazh përmes një videoje që pasqyron disa prej punimeve dhe projekteve të Bashkisë së Tiranës gjatë javës së fundit. Nën moton se aktiviteti në kryeqytet nuk është ndërprerë, ai ka veçuar disa iniciativa që, sipas tij, përbëjnë rezultate konkrete të punës së administratës vendore.

Në reagimin e tij, kryebashkiaku rendit si arritje dhënien e 1800 kredive të buta për familjet e Tiranës, vijimin e ndërtimit të shkollës së re në zonën e Astirit, si dhe projektin e parkingut pranë Pazarit të Ri, i cili pritet të përfundojë së shpejti.

Veliaj shprehet se shkolla në Astir synohet të jetë funksionale në vitin e ardhshëm shkollor, ndërsa përmes mesazhit të tij përcjell idenë se projektet e qytetit vijojnë pavarësisht situatës në të cilën ndodhet vetë.

“Puna nuk ndalet në Tiranë dhe java që sapo mbyllëm na tregoi se aty ku ka vullnet, ka edhe zgjidhje. Jam krenar që ia dolëm të jepnim 1800 kredi të buta për familjet e Tiranës, të ecim me punimet në shkollën e re në Astir, që do të jetë gati për vitin tjetër shkollor, dhe parkingun e ri te Pazari i Ri, e plot punë të tjera për qytetin. Tirana në punë!”, shkruan Veliaj.

Ky reagim vjen në një moment kur kryebashkiaku ka ngritur publikisht pretendime për presione dhe kërcënime pas transferimit në burgun e Fierit. Gjatë javës së kaluar, ai bëri të ditur, përmes disa shënimeve të shkruara, se ishte kërcënuar nga kryeministri Edi Rama, nëpërmjet ministrit të Drejtësisë, Toni Gogu.

Sipas pretendimeve të Veliajt, atij i është kërkuar të heqë dorë nga firma në krye të Bashkisë së Tiranës dhe t’ia delegojë kompetencat Arbër Hajdarit. Po ashtu, ai ka pretenduar se është vënë nën presion për të pranuar mbështetjen ndaj lëvizjes “Flamingo” dhe protestave studentore.

Në të njëjtën linjë, Veliaj ka ironizuar edhe aludimet për një puç të organizuar prej tij nga burgu, duke vënë në pikëpyetje mundësinë për të drejtuar apo koordinuar veprime të tilla nga kushtet e kufizuara të izolimit.

Deri më tani, kryeministri Edi Rama nuk ka dhënë një përgjigje publike ndaj akuzave të bëra nga Veliaj. Një reagim i mundshëm i tij pritet të ndiqet në mbledhjen e Asamblesë së Partisë Socialiste, e cila është thirrur për datën 14 nëntor.