BE financon zhvillimin e Shqipërisë, mbi 920 milionë euro mbështetje

Mbi 920 milionë euro është paketa financiare që Shqipëria pritet të përfitojë nga Bashkimi Evropian përmes Planit të Rritjes për Ballkanin Perëndimor. Deri në maj të vitit 2026 janë disbursuar rreth 212.8 milionë euro në formën e granteve dhe kredive të favorshme.

Shqipëria do të përfitojë një paketë mbështetjeje financiare prej mbi 920 milionë eurosh nga Bashkimi Evropian përmes Planit të Rritjes për Ballkanin Perëndimor, një mekanizëm strategjik që synon të nxisë zhvillimin ekonomik, të përshpejtojë integrimin evropian dhe të krijojë mundësi të reja për qytetarët dhe sipërmarrjet.

Sipas të dhënave zyrtare, zbatimi praktik i paketës ka nisur dhe “deri në maj të vitit 2026 janë disbursuar rreth 212.8 milionë euro për Shqipërinë”, në formën e granteve dhe kredive të favorshme.

Paketa financiare është projektuar të mbulojë një sërë sektorësh me rëndësi kritike për modernizimin e vendit. Ndër prioritetet kryesore përfshihen investimet kapitale në infrastrukturë, modernizimi i transportit, krijimi i vendeve të reja të punës dhe rritja e kapaciteteve konkurruese të bizneseve vendase.

Përmes këtij instrumenti, BE-ja synon gjithashtu të forcojë lidhjet tregtare të rajonit me tregun e përbashkët evropian dhe të lehtësojë procesin e përafrimit me standardet e Bashkimit Evropian.

Autoritetet nënvizojnë se kjo mbështetje përkthehet në përfitime direkte për jetën e përditshme të qytetarëve dhe aktivitetin e sipërmarrjeve.