Duke u mbështetur në bllokadën detare disa mujore ndaj Iranit, ushtria amerikane deklaroi të shtunën se po krijon një grup të posaçëm pune për të ndihmuar në frenimin e transportit të armëve të avancuara dhe materialeve të tjera të sanksionuara nga Teherani përmes kufijve tokësorë dhe Detit Kaspik, shkruan Reuters.
Task-Forca “Iron Gate”, për të cilën raportoi fillimisht Reuters, do të ketë selinë në Tampa të Floridës dhe do të koordinojë veprimtarinë me agjenci të tjera të qeverisë amerikane. Përveç transportit të armëve, ajo do të përqendrohet edhe në ndalimin e qarkullimit të teknologjive me përdorim të dyfishtë, të përdorura nga Irani, si dhe në frenimin e burimeve të të ardhurave që Uashingtoni i cilëson të paligjshme.
Krijimi i kësaj task-force është shembulli më i fundit i përpjekjeve të vazhdueshme të SHBA-së për të shtuar presionin ndaj Teheranit, më shumë se tetë muaj pas nisjes së luftës kundër Republikës Islamike, së bashku me Izraelin.
Ndërsa sulmet amerikane i kanë shkaktuar dëme shkatërruese ushtrisë konvencionale të Iranit dhe bllokada detare amerikane ka kufizuar ndjeshëm eksportet e naftës bruto të vendit përmes Ngushticës së Hormuzit dhe Detit Arabik, Irani vijon të përbëjë një kërcënim të konsiderueshëm për rajonin, ndërsa udhëheqësit e tij kanë forcuar kontrollin mbi vendin.
RRJETI I FSHEHTË I IRANIT
Një hetim i Reuters zbuloi se Irani ka krijuar një rrjet të fshehtë agjencish ushtarake për të importuar të paktën 2 miliardë dollarë pajisje, eksplozivë dhe kamionë të rëndë që nga janari i vitit 2025, duke iu shmangur si bllokadës detare amerikane, ashtu edhe sanksioneve perëndimore.
Sipas hetimit të Reuters, materialet kanë hyrë në Iran me anije mallrash përmes Detit Kaspik nga Rusia, me kamionë nga Azia Qendrore dhe me avionë transporti nga Kina.
Komanda Qendrore e SHBA-së (CENTCOM) deklaroi se task-forca do të koordinojë veprimtarinë me agjenci të tjera qeveritare. Një zyrtar ushtarak amerikan, i cili foli në kushte anonimiteti, tha se pritet që në këtë bashkëpunim të përfshihen Departamentet e Thesarit, Shtetit dhe Drejtësisë, si dhe komuniteti i inteligjencës.
“Forcimi i bashkëpunimit të CENTCOM-it me institucionet partnere të qeverisë amerikane do ta kufizojë më tej aftësinë e Iranit për të financuar terrorizmin, për të rindërtuar fabrikat e armëve dhe për të rimbushur rezervat e tij ushtarake”, tha në një deklaratë admirali Brad Cooper, komandanti i Komandës Qendrore.
Komanda Qendrore vlerësoi se bllokada e saj detare e ka penguar Iranin të eksportojë naftë bruto me vlerë më shumë se 25 miliardë dollarë.
Megjithatë, Irani ka treguar se është në gjendje të përballojë presionin dhe ka shprehur kënaqësi pas rezultateve të zgjedhjeve të mesmandatit në SHBA, të cilat ndëshkuan Partinë Republikane të Trumpit dhe i dhanë kontrollin e Kongresit demokratëve të opozitës. Zëvendëspresidenti JD Vance fajësoi luftën me Iranin për humbjen e thellë elektorale dhe dukej se vuri në pikëpyetje nëse konflikti ia kishte vlejtur.
Ndërmjetësit kanë intensifikuar ditët e fundit përpjekjet për t’i dhënë fund luftës mes Iranit dhe Shteteve të Bashkuara, mes frikës se konflikti mund të rifillojë pas zgjedhjeve të mesmandatit në SHBA.
Trump ka kërcënuar të ndërmarrë një ofensivë të re kundër Iranit, duke rritur shqetësimin në vendet e Gjirit, pasi Teherani ka kërcënuar me kundërpërgjigje të gjerë ndaj infrastrukturës së këtyre vendeve.
Reuters ka raportuar se vlerësimet e inteligjencës amerikane gjatë muajve të fundit kanë treguar se rifillimi i sulmeve ndaj Iranit nuk do ta ndryshonte në mënyrë thelbësore qëndrimin negociues të Teheranit dhe as nuk do të çonte në rrëzimin e qeverisë iraniane.
