Hansi Flick po vazhdon të lërë gjurmë te Barcelona. Trajneri gjerman po regjistron shifra mbresëlënëse në drejtimin e katalanasve, duke u ngjitur në vendin e tretë të trajnerëve më të suksesshëm në historinë e klubit sa i përket ndeshjeve të përmbysura.
Fitorja e fundit 2-1 ndaj Atletico Madridit, në javën e 12-të të La Liga-s, ishte një tjetër dëshmi e karakterit që Flick ka ndërtuar te skuadra e tij. Barcelona e pa veten në disavantazh pas golit të Giuliano Simeones, por arriti të përmbyste rezultatin falë dy realizimeve të Fermín López, në minutat 45 dhe 66. Në golin e dytë, asistin e dha talenti Lamine Yamal.
Sipas gazetarit Oriol Giové, në një raportim për radion RAC1, Flick ka regjistruar deri më tani 23 përmbysje në 133 ndeshje në drejtimin e Barcelonës. Kjo shifër e vendos vetëm një hap larg rekordit të Pep Guardiolës, i cili ka realizuar 24 përmbysje në 249 ndeshje si trajner i katalanasve.
Në krye të këtij klasifikimi qëndron legjenda Johan Cruyff. Holandezi arriti të udhëhiqte Barcelonën drejt 28 përmbysjeve në 430 ndeshje, duke lënë Flickun vetëm pesë suksese larg barazimit të këtij rekordi historik.
Edhe këtë sezon, Barcelona ka treguar se nuk dorëzohet lehtë. Skuadra e Flick ka përmbysur rezultatin në katër takime: ndaj Rayo Vallecanos, ku fitoi 5-2, ndaj Sevillas me rezultatin 3-1, ndaj Galatasarayt me shifrat 4-1 dhe së fundmi kundër Atletico Madridit, 2-1.
Statistikat tregojnë ndikimin e trajnerit gjerman në mentalitetin e skuadrës katalanase. Me 23 përmbysje në vetëm 133 ndeshje, Flick është gjithnjë e më pranë një rekordi që për shumë vite është mbajtur nga dy prej emrave më të mëdhenj në historinë e Barcelonës, Guardiola dhe Cruyff.