Komediani britanik Russell Brand dënohet me 10 vjet e gjashtë muaj burg për përdhunim dhe sulm seksual

Aktori dhe komediani britanik Russell Brand është dënuar me 10 vite e gjysmë burg, pasi u shpall fajtor për përdhunimin e një gruaje dhe sulmin seksual ndaj tri grave të tjera.

Vendimi u shpall të hënën nga gjyqtari Joel Bennathan, i cili gjatë seancës e kritikoi ashpër sjelljen e komedianit, duke e përshkruar atë si shprehje të një përbuzjeje arrogante ndaj grave që refuzonin të kryenin marrëdhënie seksuale me të.

“Rreth 20 vjet më parë, Russell Brand, ti po bëheshe i famshëm. Ishe i zgjuar dhe, në sytë e shumë njerëzve, qesharak dhe karizmatik. Por ishe bërë gjithashtu një grabitqar seksual”, deklaroi gjyqtari gjatë shpalljes së vendimit.

Sipas vendimit të gjykatës, veprat penale kanë ndodhur në një periudhë kur karriera e Brand në botën e komedisë ishte në ngritje. Në atë kohë, ai po fitonte famë për humorin provokues, deklaratat e drejtpërdrejta mbi jetën seksuale dhe paraqitjet në televizion e radio.

Gjatë seancës së dënimit, 51-vjeçari shfaqi pak emocione. Në momentin kur oficerët e gjykatës e shoqëruan për ta marrë në paraburgim, ai u kthye nga bashkëshortja e tij dhe i tha: “Do të jemi mirë”.

Brand, i cili ndër vite është përballur edhe me probleme të lidhura me përdorimin e drogës dhe alkoolit, ka mohuar vazhdimisht akuzat ndaj tij. Ai ka këmbëngulur se marrëdhëniet seksuale në fjalë kanë qenë konsensuale.

Megjithatë, gjykata e shpalli fajtor për veprat penale ndaj katër grave dhe e dënoi me 10 vite e gjysmë burg.