Aktori dhe komediani britanik Russell Brand është dënuar me 10 vjet e 6 muaj burg, pasi një juri në Londër e shpalli fajtor për përdhunimin e një 21-vjeçareje dhe për sulme seksuale ndaj tri grave të tjera gjatë karrierës së tij në botën e spektaklit. Gjatë seancës së dënimit, gjyqtari Joel Bennathan tha se Brand, 51 vjeç, ishte “shndërruar në një grabitqar seksual” gjatë periudhës kur po ngjitej drejt famës dhe theksoi se çdo grua ka të drejtën të refuzojë marrëdhëniet seksuale, pavarësisht veshjes, vendit apo sasisë së alkoolit.
Sipas vendimit të gjykatës, Brand u shpall fajtor për përdhunimin e një gruaje në vitin 2009 dhe për sulme seksuale ndaj tre grave të tjera ndërsa ndërtonte karrierën e tij në televizion dhe industrinë e argëtimit britanik. Ai u shpall i pafajshëm për dy akuza të tjera për përdhunim dhe për një akuzë për tentativë sulmi seksual.
Gjatë seancës dëgjimore, viktimat paraqitën deklaratat e tyre, përshkruan pasojat psikologjike dhe fizike. Një grua që pretendon se ishte sulmuar në një lokal në Londër në 2004 tha se për vite ndihej e tronditur dhe vuante ndërsa shihte Brand të shfaqej në media. Gruaja që u përdhunua në 2009 tha se ishte drejtuar te alkooli për të bllokuar kujtimet dhe dhimbjen. Një tjetër viktimë e përshkroi Brand si një “grabitqar seksual që nuk ndjen pendesë për mënyrën se si sjellja e tij ka ndikuar në jetën time”.
Brand u bë i njohur në Britani në fillim të viteve 2000, fillimisht si prezantues televiziv dhe më pas përmes projekteve në radio, film dhe televizion; karriera e tij mori hov pas prezantimit të “Celebrity Big Brother’s Big Mouth” në Channel 4. Në 2006 ai nisi një emision në BBC Radio, nga i cili u largua në 2008 pas një skandali me mesazhe fyese dhe seksiste ndaj aktorit Andrew Sachs. Në vitet e fundit ishte përqendruar te temat e spiritualitetit, meditimit dhe fesë, jetonte në Florida dhe kishte mbi 6.6 milionë abonentë në YouTube.
Hetimet kundër tij nisën pas një investigimi të vitit 2023 nga “The Times”, “The Sunday Times” dhe Channel 4, ku u ngritën akuza nga disa gra të tjera. Policia Metropolitane konfirmoi hetimin për dy akuza të tjera përdhunimi dhe kreu i policisë Mark Rowley tha se nuk do të habitej nëse do të dilnin edhe më shumë pretendime. Prokuroria e Kurorës theksoi se vendimi tregon se fama dhe kalimi i kohës nuk ndryshojnë rëndësinë e pëlqimit. Brand nuk shfaqi emocione gjatë vendimit; përpara se të merrej nga autoritetet ai i tha bashkëshortes Laura Gallacher: “Do të jemi mirë”.