“Godzilla Minus Zero” thyen rekordin në SHBA, arkëton 31.6 milionë dollarë në fundjavën e parë

Ky rezultat përbën një rekord të ri për premierën më të suksesshme të një filmi në gjuhë të huaj në Amerikën e Veriut.

Prodhimi i ri i regjisorit Takashi Yamazaki, vazhdim i filmit fitues të çmimit Oscar “Godzilla Minus One” (2023), arriti të lërë pas edhe filmin e animuar të Warner Bros., “The Cat in the Hat”, me protagonist Bill Hader. Ky i fundit regjistroi 20.5 milionë dollarë të ardhura në tregun amerikan dhe 10 milionë dollarë nga shitjet ndërkombëtare të biletave.

Ngjarjet e “Godzilla Minus Zero” zhvillohen në Japoninë e vitit 1949, dy vjet pasi Godzilla besohej se kishte vdekur në fund të oqeanit. Përbindëshi legjendar rikthehet në një moment kur vendi po përpiqet të rimëkëmbet nga pasojat e Luftës së Dytë Botërore, për t’u përballur me një kërcënim të ri, krijesën me tre koka të njohur si Ghidorah.

Në film, Godzilla, i rikthyer në jetë përmes rrezatimit, përballet me kundërshtarin e tij të fuqishëm, i cili shkatërron ndërtesa dhe lëshon rrufe nga goja. Në këtë betejë përfshihen edhe njerëzit, ndërsa Japonia përballet me një tjetër kërcënim shkatërrues.

Suksesin e filmit e ka përshëndetur edhe Koji Ueda, president i kompanisë Toho Global, e cila qëndron pas prodhimit. Sipas tij, rezultatet e arritura tregojnë lidhjen e fortë që publiku në mbarë botën ka me personazhin e Godzillës dhe vizionin e regjisorit Takashi Yamazaki.

Rekord edhe në Japoni

Suksesi i filmit nuk është kufizuar vetëm në tregun amerikan. Në Japoni, “Godzilla Minus Zero” arkëtoi 5.75 milionë dollarë vetëm në ditën e parë të shfaqjes, më 3 nëntor, duke vendosur një rekord të ri për debutimin ditor të një filmi me aktorë të drejtpërdrejtë në vend.

‘Godzilla Minus Zero’ is king of the box office in its opening weekend as the sequel feature tallies the biggest launch in its distributor’s history

Full weekend charts: https://t.co/Dy0XkvXLMw https://t.co/m6ppLcjCBU

— The Hollywood Reporter (@THR) November 9, 2026

Sipas kompanisë Toho, të ardhurat e ditës së parë ishin më shumë se dyfishi i atyre të regjistruara nga filmi paraardhës, “Godzilla Minus One”.

Një pjesë e xhirimeve u realizua në ambiente reale, përfshirë një park sportiv në prefekturën Ibaraki, në verilindje të Tokios, si dhe në një tempull në Maizuru, në prefekturën e Kiotos.

Analisti i industrisë së filmit, David A. Gross, vlerësoi se premiera e re e ka çuar kinemanë japoneze në një nivel tjetër, duke theksuar se të ardhurat e saj janë pothuajse trefishi i debutimit të “Godzilla Minus One” në dhjetor 2023.

Përballje me prodhimin indian “Ramayana”

Pavarësisht rezultateve mbresëlënëse, filmi japonez përballet me konkurrencë të fortë në tregun ndërkombëtar nga prodhimi indian “Ramayana: Rise of a Legend”.

Ky i fundit regjistroi 55.7 milionë dollarë të ardhura në fundjavën e parë, duke u renditur ndër debutimet më të suksesshme. Filmi, i realizuar në gjuhën hindi, konsiderohet prodhimi më i shtrenjtë në historinë e kinemasë indiane. Ai arkëtoi 8.7 milionë dollarë në SHBA dhe 32 milionë dollarë në Indi.

Të dy prodhimet janë konceptuar për t’u shfaqur edhe në formatin IMAX. “Godzilla Minus Zero” u publikua fillimisht ekskluzivisht në këto kinema, një javë përpara se të niste shpërndarja e tij më e gjerë në kinematë ndërkombëtare.

Top Channel