Qeveria franceze ka vendosur të rrisë me 1.6% pagën minimale, duke e çuar atë në rreth 1,502 euro neto në muaj. Vendimi do të hyjë në fuqi më 1 dhjetor, një muaj më herët se rritja automatike e parashikuar fillimisht për janarin.
Masa vjen pas disa javësh protestash për fuqinë blerëse dhe përkeqësimin e kushteve ekonomike. Me këtë ndryshim, punonjësit që paguhen me pagën minimale do të përfitojnë rreth 23.65 euro më shumë në muaj, krahasuar me nivelin aktual prej 1,477.93 eurosh.
Ministri i Punës, Jean-Pierre Farandou, bëri të ditur se qeveria ka vendosur të përshpejtojë rritjen automatike dhe ta zbatojë atë që më 1 dhjetor.
“Lidhur me pagën minimale (SMIC), kemi vendosur dy gjëra, ta aplikojmë më 1 dhjetor rritjen automatike, e cila ishte parashikuar të hynte në fuqi më 1 janar dhe që kjo rritje të jetë 1.6%”, deklaroi ai gjatë një konference për shtyp.
Kryeministri Sébastien Lecornu e cilësoi këtë si rritjen e dytë më të madhe të pagës minimale në 20 vitet e fundit, duke theksuar se masa nuk duhet nënvlerësuar.
Nga ana tjetër, ministri Farandou u bëri thirrje përfaqësuesve të sektorëve profesionalë të nisin që javën e ardhshme negociatat për rritjen e pagave minimale të përcaktuara në marrëveshjet kolektive, në mënyrë që ato të përshtaten me nivelin e ri të SMIC.
Megjithatë, vendimi nuk ka kënaqur sindikatat. Kryetarja e CFDT-së, Marilisé Léon, e konsideroi rritjen të pamjaftueshme, ndërsa drejtuesja e CGT-së, Sophie Binet, e cilësoi atë si “thërrime”.
“Ne nuk erdhëm këtu për të lypur lëmoshë”, deklaroi Binet, e cila bëri thirrje edhe për organizimin e protestave të reja më 17 nëntor.
Në Francë, paga minimale indeksohet zakonisht çdo janar në bazë të inflacionit, por ligji lejon edhe rritje të ndërmjetme gjatë vitit. Qeveria po përpiqet të lehtësojë pakënaqësinë për koston e jetesës, ndërkohë që mundësitë për ndërhyrje ekonomike kufizohen nga rritja e borxhit publik.