Një analizë e Federatës Europiane për Transport dhe Mjedis (T&E) tregon se përhapja e automjeteve elektrike po ul ndjeshëm varësinë nga nafta dhe emetimet. Aktualisht makinat elektrike në qarkullim po kursejnë rreth 1.2 milionë fuçi naftë në ditë, një rritje pesëfish krahasuar me vitin 2021, kur kursimi ishte 215 mijë fuçi në ditë, sipas të dhënave të T&E. Analiza lidh këtë rritje me rolin gjithnjë e më të rëndësishëm të automjeteve elektrike në tregun global të transportit dhe me ndikimin e tyre direkt në konsumimin e karburanteve fosile.
Duke u bazuar në politikat aktuale, T&E parashikon se deri në vitin 2034 automjetet elektrike mund të shmangin konsumin e rreth 5.8 milionë fuçive naftë në ditë, ndryshim që mund të ndikojë ndjeshëm në tregun ndërkombëtar të energjisë, veçanërisht në një periudhë pasigurie të furnizimit dhe çmimeve të naftës. Analiza nënvizon se transporti rrugor konsumon pothuajse gjysmën e naftës në nivel global, prandaj zëvendësimi me automjete elektrike shihet si një mënyrë efektive për të frenuar rritjen e kërkesës për naftë.
Përveç veturave personale, edhe autobusët dhe kamionët elektrikë po zënë territor. Sipas të dhënave, autobusët elektrikë përbëjnë rreth 5% të flotës globale, ndërsa kamionët elektrikë rreth 1%. Në disa tregje, automjetet e rënda elektrike kanë arritur të përbëjnë më shumë se gjysmën e shitjeve të reja në kategoritë e tyre. Këto mjete kontribuojnë gjithashtu në kursimin e naftës, duke shmangur deri në 320 mijë fuçi në ditë.
Analiza raporton edhe përfitime mjedisore: automjetet elektrike që qarkullojnë aktualisht shmangin më shumë se 200 milionë tonë emetime ekuivalente të CO2 çdo vit. Si tregje me përhapje të lartë të automjeteve elektrike përmenden Norvegjia, Danimarka dhe Hong Kongu. Antony Froggatt, drejtor i T&E, thekson se automjetet elektrike janë nga mjetet më efektive për të ulur kërkesën për naftë dhe për të mbrojtur vendet nga krizat energjetike, dhe se pesë vjet pas samitit të klimës në Glasgow, elektrifikimi i transportit përbën një arritje të rëndësishme në përpjekjet globale për mbrojtjen e klimës.
