Futboll Sport Të Fundit

Formacioni i vitit nga FIFPro, dominon Spanja, por është lënë jashtë fituesi i Topit të Artë

09/11/2026 22:46

FIFPro ka përcaktuar formacionin më të mirë të vitit 2026. Ishin mbi 26 mijë futbollistë nga 75 vende të botës që kanë dhënë votat e tyre për të përcaktuar ekipet në futbollin e djemve dhe të vajzave. Te skuadra e djemve është Spanja, kampione e botës që dominon, por ajo që të bie në sy është mungesa e fituesit të Topit të Artë për këtë vit, Harry Kane.

FIFPro World 11 ka në përbërje 4 futbollistë nga Spanja; Lamine Yamal, Raya, Cubarsi dhe Rodri, dy më shumë se në formacionin e vitit të kaluar, Portugalia ka dy futbollistë e më pas janë Maroku, Anglia, Norvegjia, Franca dhe Argjentina me nga 1 lojtar.

Formacioni i përcaktuar nga FIFPro është: Raya; Achraf, Cubarsí, Nuno Mendes; Bellingham, Rodrigo, Vitinha; Haaland, Mbappé, Lamine Yamal dhe Messi.

Portieri i Arsenalit ishte futbollisti më i votuar me 51.9% të votave. Pas tij vinte Mbappe me 46%. Kane mbeti jashtë 11-shes vetëm për një diferencë shumë të vogël. Fituesi i Topit të Artë mori 27.6% të votave ndërkohë që përpara tij ishin Lamine Yamal me 37.4%, Lionel Messi me 29.5% dhe Erling Haaland me 28.4%.

Hegjemonia spanjolle ishte edhe te formacioni më i mirë në futbollin e vajzave. Triumfi në Ligën e Kampioneve nga Barcelona dhe Topi i Artë i fituar nga Alexia Putellas konfirmon dominimin e Spanjës që ka 5 përfaqësuese në Formacionin e vitit.

FIFPro World 11 në futbollin e vajzave është: Hampton; Greenwood, Leon, Paredes, Bronze; Putellas, Toone, Bonmati; Pina, Russo, Banda.