Kombëtarja spanjolle ka zhvilluar një ceremoni prekëse në kujtim të sulmuesit të Tenerife-s, Jesús de Miguel, i cili humbi jetën tragjikisht në moshën 30-vjeçare pas një përplasjeje të rëndë gjatë një ndeshjeje në kategorinë e dytë të futbollit spanjoll.
Futbolli spanjoll është në zi pas ndarjes tragjike nga jeta të Jesús de Miguel. Në shenjë respekti dhe solidariteti me familjen e futbollistit, përfaqësuesja e Spanjës ka organizuar një homazh emocional përpara seancës së parë stërvitore në prag të ndeshjeve të radhës.
Futbollistët spanjollë, së bashku me trajnerin Luis de la Fuente, kanë nderuar kujtimin e sulmuesit të Tenerife-s duke vendosur në qendër të fushës një fanellë me numrin 9 dhe një buqetë me lule. Më pas, e gjithë skuadra, stafi teknik dhe disa tifozë kanë mbajtur një minutë heshtje në kujtim të 30-vjeçarit.
De Miguel ndërroi jetë pas një përplasjeje fatale me portierin e FC Andorra-s, Jesús Owono, gjatë ndeshjes së javës së kaluar në Segunda División, e zhvilluar në stadiumin “Heliodoro Rodríguez López”.
