Ushtria e Jemenit njoftoi se forcat e saj kanë vrarë ose plagosur rreth 190 komandantë dhe luftëtarë Huthi gjatë sulmeve ajrore dhe tokësore në disa fronte gjatë orëve të fundit, transmeton Anadolu.
Zëdhënësi i ushtrisë, koloneli Majed Abdullah al-Nuzaili, tha në një deklaratë se sulmet u kryen në kuadër të operacionit “Agimi i Jemenit”.
Sipas tij, avionët luftarakë kryen 29 sulme ajrore, ndërsa dronët realizuan 39 sulme. Njësitë e raketave kryen 62 sulme, kurse artileria tokësore realizoi edhe 744 sulme të tjera.
Sipas deklaratës, sulmet kishin në shënjestër pozicionet, përforcimet, fortifikimet dhe pajisjet ushtarake të Huthive.
Raportimet paraprake nga terreni tregojnë se rreth 130 automjete dhe pajisje ushtarake të Huthive janë shkatërruar ose dëmtuar, tha al-Nuzaili.
Ai bëri të ditur se luftimet vazhdojnë në frontet veriore dhe në provincat Al-Xheuf, Marib, Al-Bejda dhe Taiz, si dhe në frontet jugore dhe jugperëndimore.
Forcat qeveritare kanë rimarrë disa pozicione në sektorë të caktuar të fronteve jugore dhe jugperëndimore, ndërsa në zona të tjera përleshjet vazhdojnë, shtoi ai.
Ndërkohë, zëdhënësi ushtarak i Huthive, Yahya Saree, tha se grupi ka kryer katër operacione me raketa balistike dhe dronë kundër objektivave saudite dhe përqendrimeve të trupave në Jemen.
Ai pretendoi se objektivat përfshinin Aeroportin Ndërkombëtar King Khalid, stacionet e pompimit të naftës në tubacionin Lindje-Perëndim dhe një qendër financiare në Riad, objektet e kompanisë Aramco në Abqaiq, si dhe përqendrimet e trupave në rrethet Al-Mudarabah dhe Ras al-Arah të Jemenit.
Grupi pretendoi se sulmet shkaktuan dëme dhe viktima.
Operacioni “Agimi i Jemenit” u nis më 5 tetor.
Jemeni është përfshirë nga konflikti që nga viti 2014, kur Huthit morën nën kontroll kryeqytetin Sana dhe pjesë të tjera të vendit.
Një koalicion i udhëhequr nga Arabia Saudite ndërhyri në mars të vitit 2015 në mbështetje të qeverisë së Jemenit të njohur ndërkombëtarisht, duke shkaktuar vite luftimesh dhe një krizë të rëndë humanitare.
