Pa arsim, pa para dhe pa mbështetje familjare, Louis Vuitton lindi më 4 gusht 1821 në një fshat të vogël në rajonin malor të Jura-s. I rritur në varfëri, ai nuk ndoqi shkollën; që në fëmijëri punonte në fermën e familjes, ndërsa nëna e tij, Corinne, siguronte të ardhura duke bërë kapele. Pas vdekjes së së ëmës kur ai ishte 10 vjeç dhe rimartesës së të atit, marrëdhënia me njerkën u veshtirësua, dhe në pranverën e vitit 1835, vetëm 13 vjeç, Louis vendosi të largohej nga shtëpia.
Ai bëri një udhëtim rreth 400 kilometrash drejt Parisit, që zgjati rreth dy vjet, pa para dhe pa një plan të qartë. Gjatë kësaj periudhe flinte në pyje, ushqehej me mbetjet e ushqimit dhe siguroi jetesën duke kryer punë të ndryshme jashtë, si prerja e druve, pastrimi i stallave dhe ndihma për zejtarët. Këto përvoja i dhanë njohuri praktike mbi materialet, drurin, pëlhurat dhe përpunimin e tyre.
Në vitin 1837, në moshën 16-vjeçare, Vuitton mbërriti në Paris dhe nisi punë si praktikant pranë mjeshtrit të prodhimit të kutive dhe bagazheve, Romain Maréchal, ku mësoi zanatin që do ta shndërronte më vonë. Aftësitë dhe përkushtimi i tij tërhoqën klientelën e aristokracisë franceze; në 1853 ai u punësua nga perandoresha Eugénie si prodhues dhe paketues personal i bagazheve të saj, çka i hapi dyert e shoqërisë së lartë europiane. Në 1854 hapi dyqanin e parë në Rue Neuve des Capucines në Paris.
Risia vendimtare erdhi në 1858, kur Vuitton krijoi valixhe drejtkëndore me kapak të sheshtë, në vend të kapakëve të rrumbullakët të zakonshëm, dhe përdori një material të lehtë dhe rezistent ndaj ujit, duke bërë bagazhet më praktike dhe të grumbullueshme. Punishtja u zhvendos në Asnières dhe biznesi u zgjeroi drejt një klientele ndërkombëtare. Gjatë Luftës Franko-Prusiane të 1870-s, biznesi u shkatërrua dhe u plaçkit, por Vuitton hapi një dyqan të ri në Paris dhe vazhdoi zgjerimin ndërkombëtar.
Përballë imitimeve, ai prezantoi modele të reja; në 1888 krijoi modelin Damier. Pas vdekjes së tij në 1892, djali Georges mori drejtimin dhe në 1896 krijoi monogramin LV, që kombinonte inicialet e të atit me motive gjeometrike dhe floreale për të dalluar produktet origjinale. Sot marka Louis Vuitton është një prej emrave kryesorë të grupit LVMH, me rrjet ndërkombëtar dyqanesh dhe një pozitë të rëndësishme në tregun e modës dhe luksit, raporton NEWMONEY.