Deputeti i Partisë Socialiste, Ardit Bido, ka ndarë në dy aspekte të ndryshme të drejtën për të protestuar dhe aktet e dhunës që shoqëruan tubimet e fundit në Tiranë. Për të qeveria nuk duhet të injorojë pakënaqësitë e qytetarëve, por duhet të dëgjojë kërkesat e tyre dhe të marrë masa konkrete në përgjigje të tyre. Në këtë kontekst, Bido e cilësoi buxhetin e vitit 2027 si një hap në drejtimin e duhur, duke argumentuar se parashikon një shpërndarje më të drejtë të të ardhurave dhe një qasje më sociale.
“Një moment është reflektimi ndaj protestës si një e drejtë demokratike dhe detyrimi i qeverisë për ta dëgjuar dhe reflektuar ndaj protestës”, deklaroi Bido. Nga ana tjetër, ai u ndal te episodet e dhunshme, duke i cilësuar të papranueshme dhe duke theksuar se ato nuk përfaqësojnë qytetarët që kanë zgjedhur të protestojnë në mënyrë paqësore. Bido u shpreh se përmasat e dhunës së shfaqur në ditën e dytë të protestës ishin të pazakonta për Tiranën, madje sipas tij, të tilla ngjarje nuk ishin parë as gjatë vitit 1997.
Ai hodhi poshtë gjithashtu idenë se studentët ishin përgjegjës për aktet e dhunës, duke pretenduar se ato ishin kryer nga individë të organizuar nga Partia Demokratike dhe forca të tjera opozitare. “Nuk zgjodhën studentët të bënin dhunën. Zgjodhën të bënin dhunën disa eksponentë të organizuar nga PD dhe disa parti të vogla”, tha deputeti.
Në përfundim, Bido nënvizoi se dhuna nuk duhet të ngatërrohet me protestën demokratike, pasi, sipas tij, qytetarët kanë të drejtë të kundërshtojnë dhe të kërkojnë ndryshime, ndërsa institucionet kanë përgjegjësinë t’u përgjigjen këtyre kërkesave.