Babai 82-vjeçar i Meghan Markle, Thomas Markle, u arrestua përsëri në Shtetet e Bashkuara, disa ditë pasi ishte liruar me kusht, me dyshimin se hoqi pajisjen elektronike të monitorimit nga kyçi i këmbës. Autoritetet amerikane bënë të ditur se arrestimi u krye të martën dhe se Markle ndodhet në paraburgim, në pritje të një seance në gjykatën federale në Tampa të Floridës. Bill Essayli, ndihmës i parë i prokurorit amerikan, tha se Markle e preu byzylykun elektronik rreth orës 01:45 të mëngjesit dhe u arrestua pak më vonë. Ky ishte arrestimi i dytë brenda disa ditësh, pas ndalimit të parë të premten e kaluar.
Gjatë hetimeve, autoritetet sekuestruan rreth 78 materiale — përfshirë diapozitiva, negativë filmash dhe libra — të cilat dyshohet se përmbanin imazhe të abuzimit seksual të fëmijëve. Këto materiale u gjetën në njësi magazinimi në zonën e Los Angeles-it, që Markle i kishte marrë me qira që nga viti 2008. Hetimet ndaj tij vijojnë dhe akuzat mbeten në shqyrtim nga autoritetet amerikane.
Gjatë arrestimit të parë, Markle u mor me ambulancë nga një qendër kujdesi për të moshuarit në Lakeland. Pas këtij ndalimi, një gjykatës vendosi lirimin e tij me kusht, duke kërkuar që ai të mbante pajisjen elektronike të monitorimit. Gjykata urdhëroi gjithashtu kryerjen e një ekzaminimi për të vlerësuar aftësinë e tij mendore për të përballuar procesin gjyqësor dhe kërkoi dorëzimin e një raporti deri më 20 nëntor.
Meghan Markle, Dukesha e Sussex-it, është shprehur më herët se ishte “thellësisht e tronditur” nga akuzat pas gjetjes së një koleksioni me imazhe të abuzimit seksual të fëmijëve në ish-shtëpinë e të atit. Ajo tha gjithashtu se në vitin 2019 një letër me pretendime shqetësuese për babanë e saj ishte dërguar në polici në Londër dhe i ishte dhënë garanci se po hetohej. Meghan theksoi se distancimi i saj nga i ati dhe vendimi për të mos lejuar kontaktin e tij me fëmijët e saj kishin vetëm një arsye: mbrojtjen e tyre.
Thomas Markle jetonte këtë vit në Filipine, ku pësoi një goditje në tru dhe iu amputua këmba e majtë, dhe për shkak të gjendjes shëndetësore u detyrua të kthehej në SHBA. Sipas raportimeve të The Sun, gjysmëvëllai i Meghan zbuloi koleksionin ndërsa pastronte banesën e babait në Filipine, çka çoi në identifikimin e dy njësive magazinimi në Kaliforni.