Mungesa e kuorumit ka pamundësuar vazhdimin e mbledhjes së Komisionit Hetimor Parlamentar për veprimet dhe mosveprimet institucionale lidhur me vrasjen e Arlinda Zekajt dhe trajtimin e dhunës ndaj fëmijëve dhe grave në familje.
Kryetari i këtij komisioni, Burim Ramadani, ka bërë të ditur se mbledhja do të vazhdojë në orën 12:00.
“Në orën 12 do të mblidhemi sërish sot edhe të vazhdojmë me pikat e rendit të ditës”, ka thënë Ramadani.
Ndërkaq, deputeti i PDK-së, Eman Rrahmani, ka shprehur shqetësimin për mungesën e përgjegjësisë së anëtarëve të komisionit, duke vlerësuar se kjo po e pengon punën hetimore.
Ai ka kritikuar gjithashtu kundërshtimin e shumicës për të ftuar Zyrën e Kryeministrit për raportim, duke përmendur edhe mundësinë e thirrjes së kryeministrit.
“Ky është një nga problemet që po e diskutojmë vazhdimisht, në qoftë se nuk jemi përgjegjës në këtë komision hetimor. Kjo e pengon krejt punën. Shumica nuk kanë pranuar përsëri që të jetë Zyra e Kryeministrit (që të raportojë), nëse është nevoja me ftu edhe kryeministrin. Vazhdojnë bllokada të tilla, vonesa të tilla. Është për keqardhje, shpresoj që të bëhen të përgjegjshëm”, ka deklaruar Rrahmani.
Në rend dite të mbledhjes është zgjedhja e ekspertëve të jashtëm që do të angazhohen nga Komisioni Hetimor.