Policia e Dibrës monitoron me dron shoferët, 2 të arrestuar, mbi 1300 gjoba

DVP Dibër/Monitorim intensiv me dron, radar dhe makina inteligjente në të gjitha akset rrugore të qarkut, për parandalimin e aksidenteve rrugore dhe menaxhimin e trafikut.

Ndër fokuset kryesore të punës janë konstatimi i parakalimeve të gabuara, drejtimi i automjeteve në gjendje të dehur apo pa leje drejtimi, përdorimi i celularit gjatë drejtimit të mjetit, si dhe shkelje të tjera që cenojnë sigurinë rrugore.

Si rezultat i monitorimeve dhe kontrolleve, gjatë javës së parë të muajit nëntor janë arrestuar 2 shtetas për drejtim të automjetit në gjendje të dehur, ndërsa është proceduar penalisht në gjendje të lirë 1 shtetas, për drejtim të automjetit pa leje drejtimi.

Gjithashtu, gjatë kësaj periudhe, janë vendosur 1350 masa administrative për shkelje të ndryshme të Kodit Rrugor, kryesisht për parakalime të gabuara, ndalim/qëndrim të parregullt të automjeteve, drejtim nën efektin e alkoolit, përdorim të celularit gjatë drejtimit të mjetit, si dhe shkelje të tjera të qarkullimit rrugor.

Kontrollet vijojnë në të gjitha akset rrugore të qarkut.

Policia Rrugore e Dibrës apelon për të gjithë drejtuesit e mjeteve që të zbatojnë me rigorozitet rregullat e qarkullimit rrugor, të tregojnë kujdes të shtuar gjatë drejtimit të automjeteve dhe të kontribuojnë në rritjen e sigurisë rrugore.