Kryetari i Bashkisë së Shkodrës, Benet Beci, inspektoi punimet për rrethimin e oborrit të shkollës “Mati Lorogreci”. Ndërhyrja ka nisur pas lirimit të plotë të hapësirave përreth shkollës dhe i paraprin rikonstruksionit të godinës dhe ndërtimit të terreneve të reja sportive.
Ekipet e Ndërmarrjes së Mirëmbajtjes së Objekteve Publike po vendosin rrethimin e ri të oborrit. Me lirimin e hapësirave përreth, puna është përqendruar te oborri, përpara se ndërhyrja të shtrihet në godinën e shkollës dhe në mjediset sportive.
Projekti parashikon rikonstruksionin e plotë të shkollës “Mati Lorogreci” për të përmirësuar kushtet në të cilat nxënësit zhvillojnë mësimin. Krahas ndërhyrjes në godinë, ndërtimi i terreneve sportive do t’u krijojë nxënësve më shumë hapësirë për edukimin fizik dhe aktivitetet sportive.
Terrenet e reja parashikohet t’i shërbejnë edhe komunitetit të lagjes, duke u shtuar banorëve hapësirat ku mund të zhvillojnë aktivitete sportive.
