Ministri i Arsimit dhe Shkencës, Hajrulla Çeku, ka njoftuar se në fshatin Korishë të Prizrenit së shpejti do të hapet një çerdhe e re për fëmijë.
Përmes një njoftimi, Çeku ka bërë të ditur se ndërtesa e shkollës po rinovohet për t'i dhënë një funksion të ri, me qëllim krijimin e kushteve më të mira për fëmijët dhe familjet e kësaj zone.
"Korisha e Prizrenit së shpejti me çerdhe të re. Ndërtesën e shkollës po e rinovojmë për t'i dhënë funksion të ri, aq të nevojshëm për familjet dhe më të vegjlit tanë", ka shkruar Çeku.
Ai ka theksuar rëndësinë e edukimit në fëmijërinë e hershme, duke e cilësuar atë si bazë të zhvillimit të shëndetshëm të fëmijëve.
Ministri ka përmendur gjithashtu se rezultatet e viteve të fundit në rritjen e numrit të fëmijëve në çerdhe janë evidentuar edhe në Raportin e fundit për vendin të Komisionit Evropian. /Telegrafi/
