Takimi i fundit mes delegacioneve ukrainase dhe ruse në Abu Dabi zgjati më pak se dy orë dhe u mbyll pa u bërë i ditur ndonjë rezultat i qartë. Bisedimet dyditore u mbajtën me ndërmjetësimin e Shteteve të Bashkuara.
As Kievi dhe as Moska nuk kanë njoftuar nëse negociatat sollën përparim. Ishte takimi i parë i drejtpërdrejtë mes përfaqësuesve të dy vendeve që nga shkurti dhe u zhvillua në kuadër të përpjekjeve të ripërtërira të administratës amerikane për t’i dhënë fund luftës në Ukrainë.
Të lidhura
None found
Në Abu Dabi u zhvilluan veçmas edhe konsultime me përfaqësues të Gjermanisë, Francës, Britanisë së Madhe, Italisë, NATO-s dhe Bashkimit Europian. Ato nuk ishin pjesë e negociatave trepalëshe mes SHBA-së, Ukrainës dhe Rusisë.
Presidenti ukrainas Volodymyr Zelensky kishte deklaruar më herët se Moska pretendon se ka marrë nën kontroll edhe gjysmën e pjesës së Donbasit që mbahet ende nga Ukraina. Sipas Zelenskyt, delegacioni ukrainas iu përgjigj: “Nuk e dimë se nga dilni me pretendime të tilla. Kemi pamje filmike, fotografi dhe dëshmi të tjera që tregojnë se këto territore janë ende nën kontrollin tonë”.
Zelensky e cilësoi dallimin mes versioneve të palëve si një prej pengesave kryesore për negociatat dhe tha se kreu i Kremlinit, Vladimir Putin, “jeton në një realitet tjetër”.
Ndërkohë, përpjekjet diplomatike nuk i ndalën sulmet. Rusia kreu goditje të reja me dronë në disa rajone të Ukrainës, duke dëmtuar infrastrukturën energjetike, banesa, shkolla dhe kopshte fëmijësh.
