Aksionet e gjigantit amerikan të teknologjisë Nvidia kanë pësuar një rënie të ndjeshme në bursë, pas publikimit të lajmeve që përfshijnë drejtorin ekzekutiv të kompanisë, Jensen Huang, në një pretendim për një lidhje jashtëmartesore.

Sipas raportimeve, aksionet e kompanisë ranë me 8% gjatë tregtimit pas mbylljes së bursës të mërkurën, duke thelluar tendencën negative të ditëve të fundit. Që nga e premtja, Nvidia ka humbur më shumë se 500 miliardë dollarë nga vlera e saj në tregun e aksioneve.

Megjithatë, nuk është konfirmuar nëse pretendimet për jetën private të Huang kanë ndikuar drejtpërdrejt në rënien e aksioneve.

Nvidia është një nga kompanitë më të rëndësishme në industrinë globale të teknologjisë, falë pozicionit dominues në prodhimin e procesorëve grafikë dhe çipave që përdoren për zhvillimin e inteligjencës artificiale.

Strategjia e hershme e Jensen Huang për të investuar në këtë sektor ka luajtur një rol kyç në rritjen e jashtëzakonshme të kompanisë. Gjatë pesë viteve të fundit, vlera e aksioneve të Nvidia është rritur me më shumë se 470%, duke arritur nivelet më të larta në fillim të tetorit.

Pavarësisht rënies së fundit, Nvidia mbetet një prej kompanive më të vlefshme në botë, me një kapitalizim tregu prej rreth 4.2 trilionë dollarësh, duke u renditur pas Apple.

/rtsh.al/