Manchester United ka vendosur të shkarkojë trajnerin Michael Carrick, pas rezultateve zhgënjyese dhe një nisjeje katastrofike të sezonit.

Drejtuesit e klubit anglez kanë humbur durimin dhe kanë nisur punën për të sjellë në “Old Trafford” Mauricio Pochettinon.

Carrick kishte arritur ta rikthente Manchester United në Champions League pas një ecurie të shkëlqyer në gjysmën e parë të vitit 2026, por sezoni aktual ka rezultuar një zhgënjim i madh.

Barazimi spektakolar 4-4 ndaj Aston Villas ishte goditja e fundit për teknikun anglez. United ka fituar vetëm një nga 10 ndeshjet e para në Premier League dhe ndodhet në zonën e rënies nga kategoria, përpara transfertës së vështirë ndaj Liverpoolit.

Problemet nuk kanë munguar as në kompeticionet e tjera. “Djajtë e Kuq” u eliminuan nga Kupa e Ligës pas humbjes 3-2 ndaj Brightonit, ndonëse kishin kaluar në avantazh 2-0 që në 10 minutat e para. Ndërkohë, në Champions League kanë pësuar dy humbje në katër takime, përfshirë disfatën 4-1 ndaj Comos dhe atë 3-0 në shtëpi kundër Bournemouthit.

Drejtuesit Jason Wilcox dhe Omar Berrada kanë vendosur se Carrick nuk mund të vazhdonte më në detyrë dhe ia kanë rekomanduar shkarkimin bashkëpronarit Jim Ratcliffe gjatë takimeve të zhvilluara në Monako.

Ndërkohë, objektivi kryesor për stolin është Mauricio Pochettino. Sipas raportimeve të “GiveMeSport”, Manchester United ka arritur një marrëveshje paraprake me trajnerin argjentinas për kushtet personale të kontratës.

Pochettino, i cili ka drejtuar më parë Southamptonin, Tottenhamin dhe Chelsean, është i interesuar për aventurën në “Old Trafford”. Megjithatë, United duhet të zgjidhë edhe çështjen e klauzolës së largimit prej 10 milionë dollarësh nga kontrata e tij me përfaqësuesen e SHBA-së, të rinovuar në gusht.