Kompania “Kurum International” humb pas 10 vitesh lejen mjedisore për veprimtarinë në Kombinatin Metalurgjik të Elbasanit. Agjencia Kombëtare e Mjedisit e inspektoi kompaninë më 15 qershor 2026 dhe konstatoi shkelje në transferimin e mbetjeve.
Ministri i Mjedisit, Sofjan Jaupaj firmosi më 3 nëntor urdhrin për shfuqizimin e lejes mjedisore të tipit A, për prodhimin e gizës dhe çelikut dhe përpunimin e metaleve.
Inspektorët konstatuan se Kurum kishte transferuar mbetje skorjesh te subjekti “Petri Qosja Bajrami”, në shkelje të kushteve të lejes. Kompania kishte transferuar mbetje edhe te “Fierros Alava”, që sipas inspektorëve nuk kishte licencë për t’i trajtuar.
Më 25 qershor, Agjencia vendosi një gjobë prej 2,6 milionë lekësh dhe një masë pezullimi. Vendimi mbeti në fuqi pas ankimit të kompanisë. Në tetor, Agjencia i propozoi ministrit heqjen e lejes.
Kompanisë “Kurum International” iu kthyen nga Tajlanda 2 800 tonë mbetje të rrezikshme. Mbetjet ishin shitur për eksport te kompania “Sokolaj” dhe në fatura ishin deklaruar si “oksid hekuri”. Për këtë dosje u caktuan 33 masa sigurie, shtatë prej tyre për administratorë dhe punonjës të Kurum.