Trump: SHBA nuk ka më nevojë për marrëveshje me Iranin, ne kemi paratë e tyre dhe kontrollin e Hormuzit

Presidenti amerikan Donald Trump ka deklaruar se Shtetet e Bashkuara nuk kanë më nevojë të arrijnë një marrëveshje me Iranin, duke pretenduar se Uashingtoni ka tashmë ndikim të konsiderueshëm mbi Teheranin dhe kontroll mbi Ngushticën strategjike të Hormuzit.

“Nuk kemi nevojë për një marrëveshje me Iranin. Ato ditë kanë kaluar prej kohësh”, shkroi Trump të enjten në platformën e tij Truth Social.

Në të njëjtin postim, presidenti amerikan pretendoi se SHBA-të kanë në dispozicion asetet financiare të Iranit, të cilat sipas tij kapin vlerën e qindra miliardë dollarëve, si dhe kontrollin e rrugës ujore me rëndësi strategjike.

“Ne kemi paratë e tyre, qindra miliarda dollarë, dhe kemi Ngushticën e tyre!”, deklaroi Trump.

Ngushtica e Hormuzit është një nga korridoret më të rëndësishme detare në botë për transportin e naftës dhe gazit. Çdo zhvillim që prek lëvizjen e anijeve në këtë zonë ka ndikim të drejtpërdrejtë në tregjet ndërkombëtare të energjisë dhe sigurinë rajonale.

Ndërkohë, në të njëjtin reagim, Trump njoftoi se i kishte kërkuar zëvendëspresidentit JD Vance të përqendronte vëmendjen te ajo që ai e cilësoi si “korrupsion dhe krim masiv” në shtetet dhe qytetet e drejtuara nga demokratët.

Presidenti amerikan përmendi në mënyrë të veçantë Minesotën, Kaliforninë dhe Illinoisin, duke pretenduar se në këto shtete po përvetësohen miliarda dollarë çdo muaj.

“Buxheti ynë mund të balancohet shpejt me korrigjimin e këtij aktiviteti kriminal në shkallë të gjerë”, shkroi Trump, duke akuzuar drejtuesit demokratë për korrupsion.