Gjatë vizitës zyrtare në Hungari, Ministri për Evropën dhe Punët e Jashtme, Ferit Hoxha zhvilloi një bashkëbisedim në Universitetin Ludovika të Shërbimit Publik në Budapest, ku prezantoi prioritetet e Shqipërisë për forcimin e diplomacisë ekonomike dhe kontributin e saj në zhvillimin e vendit. Përballë studentëve dhe përfaqësuesve të universitetit, Hoxha theksoi se diplomacia shqiptare duhet të marrë një rol gjithnjë e më aktiv në mbështetjen e ekonomisë, duke u shndërruar në një urë lidhëse mes bizneseve shqiptare dhe tregjeve ndërkombëtare.
Sipas tij, përfaqësitë diplomatike duhet të angazhohen më shumë në promovimin e eksporteve, identifikimin e mundësive për investime, hapjen e tregjeve të reja dhe krijimin e partneriteteve që sjellin përfitime konkrete për ekonominë shqiptare. “Diplomacia jonë nuk duhet vetëm të përfaqësojë vendin, por edhe të krijojë mundësi për të”, u shpreh ministri, duke nënvizuar se marrëdhëniet politike duhet të shërbejnë si bazë për bashkëpunime ekonomike me rezultate të prekshme.
Një pjesë e rëndësishme e diskutimit iu kushtua edhe procesit të integrimit evropian, të cilin Hoxha e cilësoi si një transformim që shkon përtej objektivave politike dhe gjeopolitike. Sipas tij, rruga drejt Bashkimit Evropian kërkon modernizimin e institucioneve, rritjen e konkurrueshmërisë dhe përgatitjen e ekonomisë shqiptare për t’u bërë pjesë e Tregut Unik Evropian.
Në këtë kontekst, diplomacia ekonomike shihet si një instrument i rëndësishëm për të afruar Shqipërinë me standardet evropiane, për të tërhequr investime cilësore dhe për të forcuar bashkëpunimin me partnerët ndërkombëtarë në fushën e teknologjisë dhe dijes. Në përmbyllje të bashkëbisedimit, ministri Hoxha theksoi se suksesi i diplomacisë duhet të matet jo vetëm përmes marrëveshjeve dhe kontakteve ndërkombëtare, por edhe nga ndikimi që ajo ka në jetën ekonomike të vendit. “Diplomacia nuk matet vetëm me marrëveshjet që nënshkruajmë, por edhe me mundësitë që krijojmë”, përfundoi ministri.