Gjykata Administrative e Apelit vendosi më 9 nëntor që të shfuqizojë vendimin e Këshillit të Lartë të Prokurorisë për përjashtimin e anëtarit Zeqir Hoda nga procedurat e zgjedhjes së Prokurorit të Përgjithshëm.
Hoda u përjashtua nga KLP me shumicë votash, bazuar në një kërkesë të anëtarit Vatë Staka dhe një përplasjeje mes anëtarëve që pretendonin përjashtimin e njëri-tjetrit nga procesi.
Hoda e cilësoi të paligjshëm vendimin e shumicës së KLP-së dhe ju drejtua Gjykatës Administrative të Apelit me kërkesë- padi për ta shfuqizuar vendimin, kërkesë që u gjet e drejtë.
Procesi për zgjedhjen e Prokurorit të Përgjithshëm vijon të mbetet në vendnumëro në Këshillin e Lartë të Prokurorisë, ndonëse mandati i kryeprokurorit aktual, Olsian Çela përfundon më 5 dhjetor.
Në mbledhjet plenare të fundit, KLP nuk ka parashikuar në rend dite procedurën e përzgjedhjes së Prokurorit të Përgjithshëm. Situata e krijuar nga Këshilli i Lartë i Prokurorisë në këtë procedurë, ka ngritur shqetësime tek trupa e prokurorëve. Shoqata e Prokurorëve i kërkoi një muaj më parë këshillit që të kapërcejë ngërçin dhe të garantojë vijimin e procedurës.
Sipas përcaktimeve kushtetuese, Prokurori i Përgjithshëm zgjidhet me tre të pestat e anëtarëve të Kuvendit, mes tre kandidatëve të propozuar nga Këshilli i Lartë i Prokurorisë, për një mandat 7-vjeçar dhe pa të drejtë riemërimi. Po ashtu, në Kushtetutë përcaktohet se një prej rasteve kur përfundon mandati i Prokurorit të Përgjithshëm, është kur i përfundon mandati 7-vjeçar, ç’ka e bënë të pamundur që kryeprokurori aktual të vijojë të qëndrojë në detyrë jashtë mandatit, nëse nuk është përzgjedhur ende pasuesi i tij.
Pesë kandidatët që janë në garë për një mandat shtatëvjeçar si Prokuror i Përgjithshëm janë: prokurori i SPAK, Adnan Xholi; ish-Prokurorja e Përgjithshme e Përkohshme, Arta Marku, aktualisht prokurore pranë Prokurorisë së Apelit Tiranë; prokurorja pranë Eurojust, Fatjona Memçaj; prokurorja e Tiranës, Rovena Zoto; si dhe prokurori Ylli Pjetërnikaj, aktualisht pedagog i brendshëm pranë Shkollës së Magjistraturës.
